Ka jingtynjuh kaba shisha ia ka BJP kadei ha ka por elekshon, ong u James Sangma
Shillong Risaw 25: U MP ka Rajya Sabha u James K Sangma uba long ruh u Nongialam ka seng NPP ha ka sngi Thohdieng, ula ong ba ka jingkiew kynsan jong ka BJP na ki 2 ngut sha ka 10 ngut ki 10 MLA hadien ka jingleit pyniasoh ki 8 ngut ki MLA ka UDP kadei shi bynta jong ka jingkylla ha ka kam saiñ pyrthei hynrei ym dei pat ban sngewthuh bakla bad ka jingjied ki paitbah ha ka por elekshon.
Haba kren halor katei ka jinglong jingman, u James Sangma ula ong, ba ka jingphet seng kadei kaba lah jia khah khah ha ka kam saiñ pyrthei ha ri India.
“Kane baroh kadei ka politik. Ki briew ki leit rung na kawei ka seng sha kawei pat, kine ki jingjia kidei kiba ju iai jia ha ka kam saiñ pyrthei hapoh ri India. Ngi lah iai sakhi ia kane man la ka por hynrei ka iapehr pat na ka jingjied jong ki paitbah ha ka por elekshon” ula ong.
Katkum ka jingong ka jongu, ka jingthew kaba shisha hi ia ka jingkhlain jong ka seng kan shong eh ha ka jingioh Vote ha ka por ba pynlong ia ka elekshon.
“Ngi donkam ban thew ia kaei kaba mih ka resol ha ka por elekshon bad ka long kaba kongsan ban peit ia ka na ka mat ha ka por ba long ka elekshon, hadih katno la ioh ia ki vote da man la ki seng saiñ pyrthei” la ong u Sangma.
Haba kylli la kane ka jingkiew ka BJP ha ka jingdon ia ki MLA kan ktah ia ka NPP, ula ong, ba ka jingiatynjuh hapoh ka iingdorbar bad ka jingioh jingkyrshan ha ki shnong ki thaw ki treikam ha la ki jong ki jong ki jaka.
“Ka jingkylla ha ka jingkhlain ka seng ha kaba iadei bad ka jingmihkhmat hapoh ka iingdorbar kan wanrah ia ka jingkylla ha ka jinglong jingman. Hynrei haduh katno kane kan wanrah ia ka jingkylla ha ki shnong ki thaw bad ka jingkhlain ka seng ha ka por elekshon, kine kidei ki artylli ki bynta kiba iapher kawei na kawei pat. Hooid, ha kawei ka bynta kan wanrah ia ka jingktah hynrei ha kawei pat ka liang, ka lah pat ban ym don satia kano kano ka jingktah” ula bynrap.
Haba kylli halor ka jingsaphriang ki khubor ban pynhiar shuki noh ia u Bah Metbah Lyngdoh na ka Kynhun Myntri, u James ula kyntait ban kren eiei halor kane.
“Nga ngam ia donbynta eiei bad ka sorkar. Nga dei tang u Member of Parliament (MP). Kine ki jingkylli dei ban buh ia ka Sorkar Jylla, ia ki Myntri Sorkar ne ia u Myntri Rangbah” ula ong.
Hato ka don kano kano ka rukom pyrkhat hapoh jong ka seng NPP ban ailad ia kiba dang rung thymmai sha ka seng ban ioh khusnam, ula bynrap, “Kan don beit ka rukom pyrkhat hapdeng ki nongkitkam ka seng. Ha ka jingpyrkhat shimet nalade hi, ngam lah ban ong eiei. Kumba nga ong, ngam don bynta eiei bad ka Sorkar”.
Peit ruh
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
The post Ka jingdon nombar ha Assembly bad ka jingioh Vote ka iapher bak la bak appeared first on Hub News.