SHILLONG: Mid-Day Meal (MDM), jekon da·o Pradhan Mantri Poshan Shakti Nirman (PM Poshan) scheme ine mingskaahachim, ia scheme-ni ning·o kam ka·enggiparangna, ma·mong sorkarini gita dormahako bariatchina dabitokengon, ia dabianiko ma·mong sorkariona ra·angna a·dokni Rajya Sabha MP James PK Sangma, ku·rachakaniko on·angaha.
MDM scheme-ni ning·o kam ka·enggiparangna ma·mong sorkarini on·enggipa dormahako bariatchina dabie, adita salrangna skang, Meghalaya Cook & Helpers Union, Malki kal·chakramo jinma tom·bimonganiko ong·ataha aro ia tom·anio union-ni dilgiparang aro a·dokni dingtang dingtang biaprango MDM scheme-ni kamko ka·enggipa hajalni hajal manderangba bak ra·angtokaha.
PM Poshan scheme-ni kamko ka·enggiparangna ma·mong sorkari bilsio ja 10-na, japrako gong 900 ka·esan dormahako on·engani gimin dormahako bariatchina gita dabiangahaoba da·alona kingkingan uamangni dabianirangko ma·mong sorkari knachakna gisik nangjaenga ine an·tangtangni kamrangko dontongatna tik ka·angaha.
Cook-cum-Helpers PM Poshan Union-ni parakatani gitade, bilsio ja 10-mangmangnasan ma·mong sorkari, dormahako japrako gong 900 ka·e kam ka·giparangna on·enga aro ia dormahakoba kam ka·giparangna somoi gita on·rongjaenga.
Meghalaya sorkaride, PM Poshan-ni kamko ka·giparangna 2022 bilsion, japrako gong 100-oniko gong 1100-ona bariataha aro ma·mong sorkarini on·enggipa gong 900-ko channe gong 2000-onade bariangpaaha ine janapatengon, ma·mong sorkarini on·enggipa gong 900 dormahakosa uamang, gong 9000-ona bariatchina dabiengachim ine union-ni dilgiparang parakataha.
Iani bidingo Cook-cum-Helpers PM Poshan Union, dingtang dingtang union minister aro sorkari official-rangnaba u·iatahachim. 2024 bilsini January jao union-ni dilgiparang, School Education & Literacy Department-ni gitcham Secretary Sanjay Kumar-koba New Delhi-o gronge, memorandum-ko on·angahachim.
Iani bidingo PM Poshan Union-ni dilgiparang, ia bilsini June 20 tariko, Union Finance Minister Nirmala Sitharaman-koba West Jaintia Hills a·jani Wahiajer-o gronge agangrikaha aro ia tom·anio a·dokni Deputy Chief Minister Sniawbhalang Dhar aro Education Minister Lahkmen Rymbui-ba dongpaaha.
Unbaksana Union-ni dilgiparang, August-ni 10 tariko, Union Education Minister Prahlad Joshi-koba gronge, ma·mong sorkarini on·enggipa dormahako bariatchina didiangahachim.
Indake ong·engon, MDM scheme-ni kamko ka·enggiparangna dormaha bariatchina dabienggipani bidingo ua an·tangan ma·mong sorkari baksa agangrikgen ine a·dokni Rajya Sabha MP James K Sangma, kam ka·giparangna ku·rachakaniko on·ataha.
“A·doko MDM-ni kamko ka·enggiparangna dormaharangko bariatchina dabienggipani bidingo anga an·tangan ma·mong sorkari baksa agangrike, uamangni dabianirangko knachakchina mol·molgen,” ine Sangma, ku·rachakaniko on·angaha.