Hambeleleni Daniel
Omupresidente Netumbo Nandi-Ndaitwah okwa tungila ovakwashiwana vavali omaumbo okudja mondjato yaye mwene kongushu yoshimaliwa shi fike poN$200 000 keshe.
Omupresidente okwa li a yandja omaumbo aa koovene Etitano. Ovanelao ovo va pewa omaumbo aa ovo: Menesia Ngunovandu osho yo Johana Kambwela.
Ngunovandu okwa tungilwa eumbo molukanda 8ste Laan mOtjomuise omanga Kambwela a tungilwa etungu laye molukanda ha li ifanwa Kilimanjaro moKatutura moshitukulwa shaKhomas.
Omaumbo aeshe okwa pula Omupresidente N$400 000.
Omaumbo okwa tungwa kehangano ha li tungu omaumbo unene aavo ve na oyuuyemo i li pedu ledina Yambuka Housing.
Oonakupewa omaumbo aa ova holola kutya ehafo meumbo mbishi mwa tomwa. Ova ti ekwafo e li kali shi ashike eyandjo leeshapi domaumbo kuvo ndele ota li ulike olukeno, okukala momaumbo e li pamufika nosho yo okukala meenhele da amenwa novapambele vavo.
Kambwela okwa holola olupandu laye kOmupresidente. Okwa ti ekwafo lOmupresidente ele mu kwafa opo a dje meumbo loshipeleki a uka meumbo olo a tungilwa komutwe woshilongo.
Nghinovandu okwa li a kumwa koilonga oyo Omupresidente e mu ningila. Newi liyadi olupandu, nehodi momesho, okwa ti Kalunga okwa uda eillikano laye okupitila mOmupresidente.
Okwa ti ota dimbuluka ngonghela eshi a li ta xukula ehodi mokuuda onghundana kutya otaka tungilwa eumbo kOmupresidente.
Nandi-Ndaitwah okwa pandula omukulunhuwiliki namwene wehangano olo la tunga omaumbo (Yambuka) Twapewa Kadhikwa eshi a wanifa po oilonga oyo a li e mu nhunina.
Okwa ti okutunga ombumbo ka kushi ashike okutula eedopi ile oitungifo kumwe, ndele okukwashilipaleka kutya ovanhu ova wanifilwa po oufemba wavo wokukala ve na omaumbo e li xwepo. Nandi-Ndaitwah okwa holola kutya okwa kufa etokolo okuyandja oshinakuwanifwa eshi kuYambuka Housing opo a tale ponghatu opo veli naashi tava dulu okueta po ngeenge tashi ya kokutunga omaumbo e li pamufika wopashinanena.
Okwa ti okwa li a hala yo okutala kutya otashi va pula efimbo li fike peni okutula kumwe oitungifi oyo ya longwa nale opo va ete po omaumbo oyo hai ifanwa prefabricated construction model.
Omutwe woshilongo owa indila omahangano epangelo osho yo opaumwene opo va nghonopeke ekwatafano nokulongela kumwe okulwifa omhumbwe yomaumbo moshilongo.
NNN okwa ti Namibia okwa pumbwa omukalo umwe tau dulu okukala tau longifwa opo ovakwashiwana aveshe va kale veli meenhele dili xwepo. Okwa kumaida oonakupewa omaumbo opo ve a kwatele po oo a shiive okulongifwa nokomapupi taeya. Omupresidente okwa indila oikondo ya yooloka opo i kandule po omashongo aeshe taa imbi okutunga omaumbo moshilonga, okutala komikalo da yooloka dopashinanena odo tadi eta po omaumbo moshiwana opo va tule pokati omhumbwe yomaumbo moshilongo. -hambelelenindaniel56@gmail.com
The post Omupresidente a landela ovakwashiwana omaumbo appeared first on New Era.