Khilaafka iyo Abwaanka oo kusii kala fogaadey buuxinta kuraasta reer Sanaag.

Khilaafka u dhexeeya Madaxweynaha Waqooyi-bari Soomaaliya, Cabdulqaadir Axmed Aw-Cali (Firdhiye), iyo ku-xigeenkiisa Cabdirashiid Yuusuf Jibriil (Abwaanka) ayaa dib usoo cusboonaaday, iyadoo hadda siweyn laysugu maandhaafsan yahay cidda awoodda u leh buuxinta kuraastii ay banneeyeen xildhibaanno kasoo jeeday gobolka Sanaag oo dhawaan u goostay Maamulka Somaliland.

Madaxweyne Firdhiye iyo Wasiir Gamaal oo kaashanaya qaar kamid ah cuqaasha ka soo jeeda Sanaag ayaa guddoonka barlamaanka Maamulka Waqooyi Bari u gudbiyay liis ay ku doonayaan in lagu buuxiyo kuraasta bannaan, si meesha looga saaro doonista garabka Abwaanka.

Dhanka kale, Madaxweyne-ku-xigeen Cabdirashiid Abwaanka, Garaad Cabdikariin Cali Garaad iyo xubno kale ayaa iyaguna Baarlamaanka u gudbiyay liis kale, waxayna sheegeen inay iyagu lee yihiin awoodda soo xulista xubnaha barlamaanka, taasi oo markale cirka ku sii shareertay khilaafka labada dhinac.

Garabka Madaxweyne-ku-xigeenka ayaa sidoo kale sheegay inay ka laaban karaan midnimadii Maakhir iyo SSC ee ay sheegeen inay iyagu horseedeen, haddii aan la tixgelin mowqifkooda aysanna ansax noqon xubnaha barlamaanka ee ka imaanaya gobolka Sanaag.