Ang mainitong panaglalis nila ni Cebu City Councilor Joel Garganera ug Vice Mayor Tomas Osmeña bahin sa problema sa basura sa dakbayan timailhan sa demokrasya.
Mao kini ang paghulagway sa chief of staff ni Cebu City Mayor Nestor Archival nga si Kenneth Siasar.
Matod niya, padayon pang gitun-an sa City Government ang gisugyot nga proyekto sa pagproseso sa basura sa dili pa modesisyon kon kini ipatuman.
Niingon si Siasar nga normal lang ang panaglalis tali sa mga konsehal panahon sa paghisgot sa mga isyu.
Matod niya adunay susamang mga panaglalis sa dihang konsehal pa si Archival.
Alang kang Siasar, ang panaglalis nila ni Garganera ug Osmeña niadtong Oktubre 13, 2026, bahin sa pagpangita og solusyon sa problema sa basura ug dili tungod sa personal nga interes.
Sigon niya, usa kini ka maayong pagbinayloay sa mga ideya nga nagpakita nga nabalaka ang mga opisyal sa executive ug legislative sa pagpangita og solusyon.
Nagsugod pag-usab ang isyu human gipangutana ni Garganera si Osmeña kon unsa na ang iyang gisaad nga plano sa pagdumala sa basura.
Atol sa iyang privilege speech, nahinumdom si Garganera nga niadtong Mayo 26, nihangyo si Osmeña sa Sangguniang Panlungsod og 60 ka adlaw aron maandam ang solusyon.
Apan matod ni Garganera, nilabay na ang 137 ka adlaw nga wala pa mapresentar sa konseho ang maong plano.
Si Osmeña, hinuon, niingon nga gisumiter na niya ang iyang sugyot ug si Mayor Archival na ang modesisyon kon kini ipatuman.
Gikompirmar ni Siasar nga nadawat na sa City Government ang plano ni Osmeña, apan wala niya motug-an kon kanus-a kini nadawat.
Gipasabot niya nga dili pasabot nga sugdan dayon ang proyekto human masumiter ang sugyot.
Kinahanglan pa kining susihon ug moagi sa gikinahanglang mga proseso.
Usa sa mga butang nga gitun-an sa City Government mao ang lugar diin ibutang ang makinarya sa pagproseso sa basura.
Matod ni Siasar, usa sa unang gikonsiderar mao ang Block 27 duol sa utlanan sa Cebu City ug Mandaue City.
Apan gisupak kini sa mga opisyal sa Mandaue, busa nangita ang Cebu City og laing posibleng lugar.
Gitun-an sab sa administrasyon kon epektibo ba ang makinarya sa pagsulbad sa problema sa basura sa dakbayan. / CAV