Ճապոնիայի աերոտիեզերական հետազոտությունների գործակալությունը (JAXA) հայտարարել է, որ հաջողությամբ տիեզերք է արձակել H3 հրթիռը՝ MMX սարքով, որը պետք է ուսումնասիրի և հողի նմուշներ կհավաքի Մարսի արբանյակ Ֆոբոսից և դրանք բերի Երկիր: Հրթիռն արձակվել է Տանեգասիմա տիեզերական կենտրոնից հոկտեմբերի 20-ին:
Դեպի Մարս ամբողջ նախագիծը՝ իր հինգ տոննա կշռող սարքով, կոչվում է «Մարսի արբանյակների հետազոտություն» (Martian Moons Exploration՝ MMX): Նախատեսվում է, որ այն կվերադառնա Երկիր 2031 թվականին: Ֆոբոսի ուղեծիր երկկողմ ճանապարհորդությունը կտևի մոտ մեկ տարի:
MMX առաքելությունը դեպի Մարս կտևի ընդհանուր առմամբ հինգ տարի։ Սարքը երեք տարի կանցկացնի ուղեծրում՝ ուսումնասիրելով Ֆոբոսը և Դեյմոսը, որը Մարսի մեկ այլ արբանյակ է: Դրանց տրամագծերը համապատասխանաբար կազմում են ընդամենը մոտ 20 և 10 կիլոմետր: Նախատեսվում են նաև վայրէջքներ Ֆոբոսի վրա՝ ուսումնասիրության և հողի նմուշառման համար:
Նախագիծը գնահատվում է 578 միլիոն դոլար: Դրան մասնակցում են Ճապոնիան, ԱՄՆ-ն, Ֆրանսիան, Գերմանիան և Եվրոպական տիեզերական գործակալությունը: Ֆրանսիան և Գերմանիան մշակել են Idefix մարսագնացը, որն այս անունն է ստացել ֆրանսիական Աստերիքս և Օբելիքս կոմիքսների շան անունով:
Ֆոբոսի վրա առաջինը վայրէջք կկատարի քառանիվ ռովերը՝ Idefix, որը միկրոալիքային վառարանի չափեր ունի: Սարքն այնտեղ կանցկացնի մոտ 100 օր և կշարժվի վայրկյանում 1 մմ արագությամբ: Հետո վայրէջք կկատարի MMX-ը, որն այնտեղ կանցկացնի ընդամենը երկու ժամ՝ 10 գրամ հող հավաքելու համար:
ԽՍՀՄ-ն և Ռուսաստանը երեք անգամ փորձել են առաքելություն ուղարկել Ֆոբոս և վայրէջք կատարել դրա մակերևույթին։ Միայն 1989 թվականին «Ֆոբոս 2»-ին է հաջողվել հասնել Մարսի այս արբանյակ և պատկերներ փոխանցել Երկիր։ Երեք առաքելություններից և ոչ մեկին չի հաջողվել վայրէջք կատարել Ֆոբոսի վրա: