SHILLONG: Adita salrangna skang, All Khasi Hills A·chik Joint Action Committee (AKHAJAC)-ni jinma tom·bimonganiko South West Khasi Hills a·jani Puksora songo ong·atangenba, Khasi aro Jaintia Hills a·jarango, District Selection Committee (DSC)-rangni dingtang dingtang kamna porikkarangko ong·atanio A·chik chadamberang neng·nikanirangko chagrongna nangengani gimin chanchirimangaha.
Tom·a matchotani ja·man AKHAJAC-ni dilgipa John D Sangma, kobor ra·timgipa manderang baksa agangrikengon, DSC-ni kamna ra·anio, Khasi-Jaintia Hills jolrango Khasi subject-ko aro Garo Hills-o Garo subject-ko nangtelgipa ong·atna ia 2026 bilsini January jao sorkari ge·etaniko on·ani a·sel Khasi aro Jaintia Hills a·jao songdongenggipa A·chik candidate-rangde neng·nikanirangko chagrongna nangenga ine parakatenba, ia niamko dingtangatchina sorkario dabiangaha.
“Khasi aro Garo ku·sik minggnian da·o Meghalaya a·dokni official language ine ra·gatako man·ahani gimin a·dokni pilak DSC-rangon, ia ku·sik minggnikon ra·na nanga,” ine Sangma aganaha.
Khasi aro Jaintia Hills a·jarango songdongenggipa A·chikrang da·o lak 4-na batahani gimin ia jolrango songdongenggipa A·chikrangnaba apsan cholko on·pana nanga ineba ua sorkariko didiataha.
“Chinga Khasi Hills-on atchie dal·atako man·giparang ong·a indide graduate ong·ani gimin chingni chadamberangara bachi re·angkugen? Sorkariko iako ma·sichakna nanga aro ia niamko dingtangatpilna nanga,” ine AKHAJAC-ni dilgipa aganaha.
An·tangtangni bilna dakgrikna gita AKHAJAC, A·chikrangni songdongenggipa Khasi Hills a·jani dingtang dingtang songrango, iandakgipa tom·anirangko ong·atangkugen ineba Sangma, MDA sorkarina mikrakataniko on·angaha.
“Iade a·bachenganisan ong·kuenga aro sorkari chingni dabianirangko knachakja ong·ode chinga chingni bilrangna bilakbate jingjengatangkugen,” ine ua aganaha.
Iana skangba AKHAJAC-ni tom·bimonganiko, adita salrangna skang, West Khasi Hills a·jani Malangkona songo ong·atangaha aro da·o Puksora songoba gnigipa changna ia committee-ni tom·bimonganiko ong·ataha. Ia tom·bimonganio, Puksora jolrango donggipa dingtang dingtang A·chik songrangoni bang·bea manderang bak ra·angtokaha.