Tura, Oct 23: Durga Pujao manigipa miterangko galani ja•man Babupara-o donggipa Visarjan Ghat (mite galram) biapko jabolrara dake dona ine social media-o photo baksa matnanganirang ong•katahani gimin mite galani ja•man bakan dongimin niamrango pangchake, ia biapko rongtalataha ine West Garo Hills Central Puja Committee (CPC)-ni general secretary talataniko on•angaha.
Iani bidingo talataniko on•angengon, Budbar salo Durga Puja matchote miterangko galani ja•man, Bristibar attam 4:00 bajini gisepon ia mite galram biapko chu•gimik rongtalatpilaha ine CPC-ni general secretary Arup Nag parakataha.
Budbar attamo, miterangko galani ja•man, dingtang dingtang Durga Puja committee-rang, an•tangtangni nangchongmota bosturangko, chimonge ra•angpilna man•na gita kontadok-kontasni somoirangkode on•chengna nangaia indiba uni ja•man bakan ia mite galram biapko rongtalatna a•bachengaha ineba Nag parakataha.
Ia biapko rongtale rakkianian CPC-na mongsonggipa daito ong•a ine janapatengon, ia biapara Hindurangna namen rongtalgipa biap ong•a aro iani chiba rongtalgipa ong•a ine CPC-ni general secretary parakataha.
Nag-ni talatani gitade, Durga Pujako maniengmiting somoion, sona man•gijagipa aro sikkongnagipa bosturangko jakkaljachina CPC, dingtang dingtang Puja committee-rangna ge•etaniko on•aha aro mite galani somoioba, plastic, pul aro uandakgipa ma•manti jabolrang, chio balangna man•jana gita guarerangko name kachengaha. Ia biapko chu•gimik rongtalatani ja•mansa guareko pe•enba chiko jokna on•piltaiaha ineba CPC-ni general secretary parakataha.
Ia mite galram biapko CPC, District Administration, Police aro Tura Municipal Board-ni dakchakachi rongtalatna man•aha ineba Nag talataniko on•aha.
The post Durga Puja matchotani ja•man mite galram biapko rongtalataha: CPC appeared first on Hub News.