TURA: West Garo Hills a·jani Nengbapara songo, job card gnang kamko ka·e cha·enggipa manderang, VB-G RAM-G scheme-ni ning·o kam ka·gipa sal 14-ni hajirako man·tokkujaenga ine u·iataha.
Koborko on·ani gitade, ia songni job card donggiparang, September 7 tarikoni September 22 tarikona Nengbapara VEC-ni ning·o kamrangko ka·aha aro muster roll-ko September-ni 22 tariko chipahachim. Indake ong·engon, sal 15-ni ja·manoba uamangni hajirarangko on·atkujaenga ine songni manderang parakataha.
VB-G RAM-G-ni Schedule II, Para 6-o dongimin niam gitade, kam ka·ani hajirarangko, muster roll-ko chipaoni sal 15-ni gisepon on·na nanga aro somoi gita hajirako gamna man·jaode, 16-gipa salonin salprako 0.05 percent ka·e compensation-ko gamna nangskaa.
October-ni 14 tariko, songni manderang, AHAM Bawagre sub-unit-ni dilgipa, Briwat Sangma aro Singren Sangma-ni dilanichi, Tikrikilla C&RD Block-ni Block Development Officer (BDO) in-charge-ko grongenba, kam ka·giparangna compensation baksa hajirarangko gamchina lekkako on·angaha aro songni manderangna salgnini gisepon hajirarangko on·na gita BDO in-charge, ia kamko niatna ku·rachakaniko on·ataha.