DFS oo codsatay in loo kordhiyo muddada ay kaga jawaabayso dacwadda dastuurka.

Dowladda Federaalka Soomaaliya ayaa Maxkamadda Sare ee dalka ka codsatay in 15 maalmood oo dheeraad ah loo kordhiyo muddada ay qareennadeedu kaga jawaabayaan dacwad la xiriirta Dastuurka Soomaaliya ee uu soo gudbiyey Madaxweyne hore Sheekh Shariif Sheekh Axmed.

Codsiga dowladda ayaa yimid maanta oo ay ku beegnayd xilligii kama dabaysta ahayd ee loo qabatay dowladda inay ku soo gudbiso jawaabteeda iyo difaaceeda sharci ee ku aaddan dacwadda dastuuriga ah, iyadoo dowladdu codsatay in muddada loo kordhiyo illaa 7-da Nofeembar 2026, si qareennadeedu u diyaariyaan jawaabta la xiriirta arrimaha dastuuriga ah ee maxkamadda horyaalla.

Garyaqaanka Guud ee dowladda federalka ah ee Soomaaliya ayaa codsigaan u gudbiyey Maxkamadda Sare oo horay u cayintay in dowladda federalka ah ee Soomaaliya ay ku soo jawaabto ugu dambayn 22 October 2026.

Dacwaddan ayaa la xiriirta muranka ka taagan Dastuurka Soomaaliya, iyadoo Sheekh Shariif Sheekh Axmed uu arrinta u gudbiyay Maxkamadda Sare si ay uga garnaqdo qodobada uu muranku ka taagan yahay, xilli ay madaxtooyadu bilowday dhaqangelinta nuqullo katirsan dastuurka dalka.