Hambeleleni Daniel
Omudanitanga ha danene ospana yo Lions FC okwa vena onga omutulimo wekoola dingi wolixa yOshana 3rd Central Division neudo. Jonson Heita weedula 25 oha danene mokati kokapale. Heita oteshi endifa nawa meifano laye onga omudanitanga.
Heita okwa dalelwa modoolola yaKeetmanshoop moshitukulwa sha||Kharas nokwa putukila moshitukulwa shaHangwena.
Okwa ti ohokwe yokatanga kokeemadi oya hovela nale muye omanga ali ena eedula nano.
Okwa ti okudja kounona waye okwa kala ehole okutala etanga ko TV teli longele kovadanitanga vokodje yoshilongo ngaashi Lionel Messi na Ronaldinho.
Okwa ti okwa kala ehole unene Ronaldinho po opo adja naye eliluka “Dinho”.
Heita okwa findana okutula mo eekola da fika po14 nokwa kwafela vakwao ovo va tula mo oikando 15. Omutulimo dingi okwa kwafela ospana yaye opo i yangate po ekopi lo2025-2026 lolixa yOshana 3rd Central Division. Nonande a kala nohokwe okudja kounona, oshitalendi shaye osha shushuka unene okudja mofikola meengudu dopetameko. Okwa kala ehole unene okudana novanhu ava vakula nosha kala hashi mu tu omukumo ngeenge ta dana navo.
Eshi a kula okwa tameka okudanena eespana detanga ngaashi Hope Academy FC, Oshikango chiefs FC, no Young Tops FC.
Ashike okwa holola kutya olweedo laye ka kwali lipu unene tuu petameko okwa kala ha mono oiponga metanga nokwa kala a hala okweefa efimbo limwe.
Ashike omashongo oo inaemu teya omukumo. Heita okwa kala ha tuwa omukumo kovakwanedimo vaye osho yo ookaume kaye opo a pule komesho metanga.
“Oundano wo 2025-2026 no Lions FC owa fiila nge ndi kale ndina ondjokonona yakula mounyuni eshi nda tula mo okoola komunute wa xuuninwa nokuvenifa ospana yetu,” ta ti.
Heita okwa ti okwa pandula omuwiliki wospana yavo eshi ha kala emulineekela nokukala temu tu omukumo a pule komesho osho yo ovadani vakwao.
Heita okwa ti oku na omukumo kutya fikulimwe ota ka kalela npo Namibia kodje yoshilongo mokatanga kokeemadi.
Okwa ti paife ota longo nelitulemo opo a xumife komesho oshitalendi shaye nokukwafa ospana yaye i ye pombada.
-hambelelenindaniel56@gmail.com
The post Dinho oye omutulimo wekoola dingi wolixa yOshana Central Division ititatu appeared first on New Era.