OKANGHUDI- Maria Nghipangelwa ou e li ondenge ya nakufya omunyekadi omutivali Penehupifo Pohamba okwa ti ova kanifa oshiveli shavo, ongudi yakula yepata osho yo omuyandji mayelele.
Nghipangelwa weedula 73 okwa ti okwa li va dalwa 10 ashike paife ova fyaala po ashike veli vatano, ovakainhu vatatu novalumenhu vavali. Pohamba okwa xulifa Olomakaya koWindhoek mepupi lomido 78.
Okwa fiya po ounona vaye vatano osho yo omushamane waye Hifikepunye Pohamba.
Ota fudikwa moshivike tashi ya Olomakaya komukunda Okanghudi.
Ondjokonona yaye pauxupi ya yandjwa kondenge yaye Nghipangelwa pefimbo a ninga eenghundafana naKundana onghela okwa hokolola ta ti okwa dalwa momudo 1948 momukunda Okatale moshitukulwa shaHangwena. Okwa putukila pamwe navamwaina osho yo ovakulunhu waye.
Eshi a aluka kombada okwa hanga nale ovakulunhu vaye va xulifa. Okwa fikola pofikola St. Marry Odibo okudja oshikunino fiyo ondodo onihetatu. Okudja opo okwe ke li hongela oupangi natango kofikola tuu yo St. Marry mOdibo. Konima yokafimbo okwa tuminwa koTsandi, moshitukulwa shaMusati komadeulo oupangi. Omudo 1974, okwa ya kondje yoshilongo moAngola pamwe nOvanamibia vakwao.
Pefimbo e li moAngola okwa twikile eifano laye loupangi omo a kala ta yambidida Ovanamibia nokuva pa omayakulo ouhaku.
Okudja opo okwa ya koshilongo Tanzia e ke li wedela ko kelihongo laye loupangi.
Konima yefimbo okwa ya koJamaica natango aka twikila nelihongo laye loupangi.
Konima eshi a mana okulihonga, okwa alukila koNamibia ndele ta hombolwa komupresidente omitivali Hifikepunye Pohamba. Okwa dika eumbo lavo momukunda Okanghudi moshitukulwa shaHangwena.
Omudo 2005 fiyo 2015 okwa ninga omunyekadi omutivali konima eshi omushamane waye Pohamba a hoolokwa a ninge omupresidente woshilongo.
Ondenge yaye Nghipangelwa oya twikila tai mu hokolola tai ti pefimbo tava putuka, omukulu wavo okwa li ehole oilonga yoshiwambo ngaashi okutwa oilya osho yo okuhenga ondjove. “Omukulu wetu okwa li etu hole molwaashi ka kwa li ehole oudenge vaye tava shindwa. Ngeenge tu li kofikola ndele ta mono umwe weendenge daye tadi shindwa oha lotoka ndele te tu a mene,” ta ti.
Okwa tanga Pohamba ta ti okwa li omukainhu a mwena, ke hole oinima ii, alushe e na elandulafano. “Okwa li omukriste ehole okuimba.Okwa kala e li meengudulwiimbo da yooloka mongeleka yetu. Ka kwa li a faula okuya kotundimbiimbeli,” ta ti.
Okwa hokolola omukulu waye ta ti natango okwa li ehole oudano eshi a li kofikola shaashi okwa li a kufa ombinga moudano wokatanga komokambamba.
“Otwe mu tala ko afa meme shaashi oye kwa li omukulu wetu a dulu okutuyambidida ngeenge twa pumbwa oipumbiwa yomeumbo,” ta ti. Nghipangelwa okwa ti nakufya okwa fimaneke ehongo nokwa kala alushe ta kumaida ovanafikola mepata lavo opo ve li honge nelitulemo. “Otwa kanifa kahewa ketu. Tulumukwa mombili shiveli shetu, eembidi nafya omelila tu li,” ta ti. Ngoloneya mukulu waHangwena Billy Mwaningange okwa ti okwa shakeneka nakufya omunyekadi omudo 1973 pefimbo olo kwa li ta longele kOdibo pamwe nomulukadi waye. Okwa ti omudo oo, yee okwa li ta longo ofikola kEdundja.
“Omudo 1974 otwa ya okombada pamwe nomukulukadi wange osho yo nakufya tu li moAngola,” ta ti.
Okwe mu tanga ta ti okwa li omupangi woshili, ehole oilonga yaye molwaashi natango eshi e li koAngola okwa kala ta yandje omayakulo opaunamiti kovakwaita.
-fhamalwa@nepc.com.na
The post Omunyekadi Pohamba okwa li ongudi yepata …ovamwaina tava li li oshiveli shavo appeared first on New Era.