«Իմ առաջիկա ամենակարևոր անելիքը համարում եմ Հայաստանի և Ադրբեջանի միջև խաղաղության համաձայնագրի ստորագրումը և վավերացումը», - այսօր կառավարության նիստում հայտարարեց վարչապետը:
Նիկոլ Փաշինյանը նշեց, թե դա չի նշանակում, որ որևէ այլ օրակարագից հրաժարվում են:
«Բայց ես նաև ինքս ինձ համար խնդիր եմ դրել՝ մինչև 2031 թվականը հասնել այդ խնդրի լուծմանը: Բնականաբար սա նաև կառավարության և քաղաքական թիմի անելիքն է, բայց ես որպես Հայաստանի վարչապետ նաև իմ անձնական օրակարգի առումով շատ կարևոր եմ համարում, որ մենք այս խնդիրը մինչև 2031 թվականը լուծենք: Ես տեսնում եմ, որ կա այդ հնարավորությունը, հակառակ դեպքում չէի բարձրաձայնի և առաջիկայում պետք է կենտորնացած լինենք այս օրակարգի վրա»,- ասաց Փաշինյանը:
Նախօրեին էլ Նիկոլ Փաշինյանը նկարագրեց, թե իր պատկերացմամբ՝ ինչ տեսք պետք է ունենա Հայաստանը խաղաղության պայմանագրի ստորագրումից և վավերացումից հետո։ Նա դարձյալ ընդգծեց, որ Հայաստանի տարածքը պետք է լինի 29,743 քառակուսի կիլոմետր՝ Ալմա-Աթայի հռչակագրի հիման վրա ընթացող սահմանազատմամբ ու սահմանագծմամբ։ Այդ շրջանակներում, ըստ վարչապետի, պետք է նաև տարածաշրջանի բոլոր ճանապարհները ապաշրջափակվեն:
Նիկոլ Փաշինյանը նաև հայտարարել է, որ անկլավ-էքսկլավների հարցը լուծվելու է տարածքների փոխանակմամբ: Ըստ նրա՝ խաղաղության պայմանագրի ստորագրումից հետո Երևանն ու Բաքուն միմյանցից չպետք է ունենան տարածքային կամ որևէ այլ պահանջ։