SHILLONG: Meghalaya a·dokni mongsonggipa dabianirangko chu·sokate on·na ku·rachakahani giminsa United Democratic Party (UDP)-ni sakchet MLA-rang, Bharatiya Janata Party (BJP)-o napangaha ine a·kangatani ja·man, ia MLA-rangni dabianirangko chu·sokate on·na BJP-ni dilgiparang ku·rachaka dongja ine a·dokni Congress dol matnangatskaaha.
Iani bidingo kobor ra·timgipa manderang baksa agangrikengon, a·dokni mongsonggipa dabianirangko chu·sokate on·na ku·rachakahani gimin UDP-ni MLA-rang, BJP-o napangaha ine a·kangengoba, BJP-ni dilgiparang, uamangni dabianirangko chu·sokate on·na changsaba seachi ku·rachaka dongkuja ine a·doko Congress dolni dilgipa Manuel Badwar parakataha.
“UDP MLA-rangni BJP-o napna dabianirangko, BJP-ni dilgiparang, chu·sokate on·gen ine seachi ba ku·sikchi ku·rachakaba dongja. Uni gimin ia dabianirangko chu·sokatgen ine songgigrikani ba soi ka·grikani dongja,” ine Badwar aganaha.
BJP-o napanichi, Meghalaya a·dokni mongsonggipa mingbonga dabianirangko chu·sokatna man·gnok ine adita salrangna skangsan, ia sakchet MLA-rang, an·tangtangni ka·dongchakenganiko parakatahachim ine nikna man·a.
Ia sakchet MLA-rangni mongsonggipa mingbonga dabianiranga, Meghalaya Residents Safety & Security Act (MRSSA), Khasi aro Garo ku·sikko Constitution-ni Eighth Schedule-o napatchina, a·doko koela bikotna ong·piltaichina, Shillong-o Dalit Sikh manderangko Them Iew Mawlong-oniko dingtang biapona apjitatchina aro Seng Khasi baksana Sein Raij-na minority status-ko on·china dabianirangan ong·achim.
Indake ong·engon, ia dabianirangko BJP-chi dilenggipa ma·mong sorkari, chu·sokate on·bebegenchimode ian Meghalaya a·dokna aro a·dokni manderangna namgni ong·gen ine Congress dolni dilgipa aganskaaha.
“Ia MLA-rangni BJP-o napanganichi maiba namgniko ra·bagen ine chinga ka·dongenga. Ian a·dokna namgniko ra·babebea ong·ode nama. Ia MLA-rang pilakan an·tangtangni constituency-rango dal·dalgipa manderangan ong·a aro uamangni political career-rangnaba namen nangchongmotgipa ong·a indiba uamangni BJP-o napanganichi baditana kingking namgni ong·gen?” ine Badwar sing·doataha.
2028 bilsini Assembly election-na da·o bilsisa ata dongkuengani gimin ia somoirangni gisepo uamang, baditana kingking namgnirangko ra·bana man·gen, uko manderang nigen ineba Badwar aganaha.
Ia sakchet MLA-rangni BJP-o bakrimaniko Assembly-ni Speaker Thomas A Sangma, Tenth Schedule-ni Paragraph 4-ni ning·o ra·chakangahachim.
Ia MLA-rangni BJP-o napanganiko Assembly Speaker ra·chakmanahani gimin da·o BJP-ni MLA-rang sakgnioni sak 10-ona tang·doangaha indiba UDP-ni MLA-rangde sak 12-oni sakbriona tang·onangskaaha.
BJP-o napanggipa UDP-ni sakchet MLA-rangara, Amlarem MLA aro a·dokni Cabinet Minister Lahkmen Rymbui, Ranikor MLA Pius Marwein, Khliehriat MLA Kyrmen Shylla, Nongpoh MLA Mayralborn Syiem, Mawphlang MLA Matthew Beyondstar Kurbah, Mawsynram MLA Ollan Singh Suin, Shella MLA Balajied Kupar Synrem aro Sohiong MLA Synshar Lyngdoh Thabah ong·a.