Siju, Oct 21: Budbar salo, Meghalaya a·dokni Chief Minister Conrad K Sangma, South Garo Hills a·jani Siju C&RD Block-na gital office nokko rikna gita pangchakaniko songe on·angaha aro apsan salon ua, Mandalgitok songo tarigipa Synthetic Football Turf-koba oprake on·angjolaha.
Ia tom·aniko ong·atanio, Siju-Rongara MLA Rakkam A Sangma, Rongjeng MLA Jim M Sangma, Chokpot MLA Sengchim N Sangma, South Garo Hills a·jani Deputy Commissioner Sumit Kumar Singh, dingtang dingtang department-ni officer-rang, Nokma-Sordarrang, chatro chatrirang, skigiparang, dingtang dingtang mondolini dilgiparang aro Siju jolo donggipa dingtang dingtang songni manderangba bak ra·angtokaha.
Ia tom·bimonganio a·dokni Chief Minister, jinmana aganprakangengon, 2018 bilsio National People’s Party (NPP)-ni dilanichi Meghalaya sorkariko rikchengani somoion ua, a·dokni pilak biaprangon namroro silroroaniko ra·bana ku·rachakaniko on·aha aro uni ku·rachakgimin gitan ua a·dokni pilak kona noksikrangonan namroro silroroaniko sokatna rake kamko ka·enga ine parakataha.
Mandalgitok songo Synthetic Football Turf-ko kulie on·na man·ahani gimin an·tangni kusi ong·aniko parakatengon, a·dokni constituency damprakon komibeoba iandakgipa robol kal·chakani biaprangko sorkari tarie on·enga aro iana crore 300-na baten tangka paisarangko chame on·aha ine Chief Minister aganaha. Batanggimin bilsichetni gisepo a·dokni pilak dam 60 constituency-rangon stadium-rangko, robol kal·chakram biaprangko, swimming pool-rangko aro indoor stadium-rangko rikna a·dok sorkari, crore 2000-na baten tangka paisarangko koros ka·aha ineba Chief Minister aganaha.
Re·baenggipa 2027 bilsini March jao, skanggipa changna Meghalaya a·doko National Games-ko sokachakna sienga ine parakatengon, ia kal·susaanio a·song gimikoni sak 15,000-mangni gita kal·susagiparang, skie on·giparang aro official-rang bak ra·gen aro ia kal·susaanio sorkari, Siju jolni chadamberangkoba bak ra·e, medal-rangko chechina nangnikenga ine Sangma aganaha.
Manderangni namgnina sorkarini ra·gate on·gipa dingtang dingtang scheme aro program-rangni gimin janapangengon, FOCUS Plus program-ni ning·o a·dok sorkari, re·anggipa jaosan seoka man·gipa lak 1.12 manderangna gong crore 20-oni crore 30-ona kingking skanggipa instalment-ko watataha aro gnigipa instalment-koba ia 2026 bilsini December jaon watatgnok ine Chief Minister parakataha.
Chatro chatrirangni lekka porana on·enggipa scholarship-ni gimin janapatskaengon, ia scholarship-ni skanggipa instalment-o gong crore 100 tangkarangko September jao aro gnigipa instalment-o gong crore 104 tangkarangko re·anggipa antio, sak 95,000 chatro chatrirangna watataha ine Chief Minister aganaha.
Garo Hills Autonomous District Council (GHADC)-na dingtang electoral roll-ko tarina niamko ra·gatahani gimin janapatengon, ia gisik ra·na krabegipa Bill-ko a·dokni Governor ra·chakmanahani gimin da·ode Tribal ong·gijagipa manderang susana aro dilgipako seokanio bak ra·na man·jawaha ine Chief Minister parakataha.
Ia bilsio 100 Drums Wangalani bilsi 50 gapaniko manina sienggipani gimin janapangskaengon, ia chang bilsi 50 gapaniko maniani bak gita 1000 Drums Wangalako ong·atskana siengani gimin, manichakram biaprangko dal·bate tarina aro pilak nanganirangna sorkari, gong crore 5.50 tangkarangko dakchake on·aha ine Chief Minister parakataha.
Siju C&RD Block-ko namdapatna ka·enggipa kamrangni gimin janapangengon, block office-rangara, manderangna dangdike on·anio sorkarini mongsonggipa bak ong·ani gimin da·alo Siji C&RD Block-na gital office-ko rikna pangchakaniko songe on·angaha ine Chief Minister aganaha.
The post Siju C&RD Block-ni gital office-na CM pangchakaniko songe on·a; Mandalgitok-o Synthetic Football Turf-ko oprake on·angjola appeared first on Hub News.