Wasiirka Shaqada iyo Arrimaha Bulshada ee Dowladda Federaalka Soomaaliya, Prof. Salim Alio Ibro, iyo Wasiirka Jinsiga, Shaqada iyo Horumarinta Bulshada ee Jamhuuriyadda Uganda, Hon. Lt. Gen. Henry Tumukunde, ayaa kala saxiixday Heshiis Laba-geesood ah oo Shaqada ah, kaas oo lagu xoojinayo iskaashiga labada dal ee dhinacyada shaqada iyo shaqaaleysiinta.
22 October, 2026
Heshiiskan ayaa ujeeddadiisu tahay nidaaminta shaqaaleysiinta muwaadiniinta labada dal, ilaalinta xuquuqda shaqaalaha, xaqiijinta habraacyo shaqaaleysiin oo hufan oo caddaalad ah, iyo kor u qaadista badqabka iyo daryeelka shaqaalaha Soomaaliyeed iyo kuwa Uganda.
Heshiisku wuxuu sidoo kale qeexayaa waajibaadka loo-shaqeeyayaasha, habraacyada qandaraasyada shaqada, ilaalinta shaqaalaha ka dhanka ah tacaddiyada iyo ka faa’iidaysiga sharci-darrada ah, iyo xoojinta iskaashiga hay’adaha ay khusayso ee labada dal.
Sidoo kale, waxaa heshiiska ku jira hannaan wada-shaqayn iyo dabagal oo lagu hubinayo hirgelintiisa, laguna xallinayo khilaafaadka shaqada, iyadoo la raacayo shuruucda iyo xeerarka labada dal.
Heshiiskan ayaa qayb ka ah dadaallada Dowladda Federaalka Soomaaliya ee lagu horumarinayo maamulka suuqa shaqada, lagu ilaalinayo xuquuqda shaqaalaha, laguna ballaarinayo fursadaha shaqo-abuurka iyo iskaashiga caalamiga ah ee dhinaca shaqada.
Explore more on these topics