ДУШАНБЕ, 24.10.2026 /АМИТ «Ховар»/. Дар нуҳ моҳи соли 2026 нақшаи воридоти маблағ ба буҷети суғуртаи иҷтимоӣ ва нафақа дар вилояти Суғд 106,4 фоиз иҷро гардида, 87,3 фоизи хароҷоти умумии буҷети маҳаллӣ ба соҳаҳои ҳаётан муҳими иҷтимоӣ равона карда шудааст. Дар ин хусус АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад.
Мувофиқи нишондиҳандаҳои оморӣ, дар ин давра воридоти маблағ ба буҷети суғуртаи иҷтимоӣ ва нафақа ба ҷойи 1319,7 миллион сомонии пешбинишуда дар амал 1404,5 миллион сомониро ташкил дод, ки ин аз иҷрои барзиёди нақша гувоҳӣ медиҳад.
Дар қисми хароҷоти буҷети маҳаллӣ, ки 3812,4 миллион сомонӣ пешбинӣ шуда буд, нақша ба маблағи 3762,2 миллион сомонӣ (98,7 фоизи нақша) таъмин гардид. Чун ҳарвақта, сиёсати молиявии вилояти Суғд хусусияти амиқи иҷтимоӣ дошта, ба маблағгузории соҳаҳои калидӣ дар маҷмуъ 3283,5 миллион сомонӣ равона карда шуд. Аз ҷумла, ба соҳаи маориф 2105,7 миллион сомонӣ, тандурустӣ- 956,4 миллион сомонӣ, фарҳанг ва варзиш- 197,8 миллион сомонӣ ва ба ҳифзи иҷтимоии аҳолӣ 23,6 миллион сомонӣ.
Ин нишондиҳандаҳо бори дигар тасдиқ мекунанд, ки дастгирии соҳаҳои маориф, тандурустӣ ва ҳифзи иҷтимоии аҳолӣ дар сиёсати давлатӣ ва маҳаллӣ бартарӣ доранд.
АКС: Хадамоти матбуоти Раиси вилояти Суғд
Октябрь 24, 2026 15:30