TSUMEB- Moses Uiseb weedula 34 na Alfonso Uiseb weedula 26 ovo vati va dipaa mumwainamati ova anyenwa omhito yokulifutila mo modolongo pefimbo va holoka momhangu yaTsumeb oshivike sha dja ko.
Oshibofa shavo osha undulilwa komafiku 27 Januali 2027, nelalakano lokuninga omakonakono omoule. Otava pangulilwa oshibofa shedipawo.
Ovalumenhu ava vavali ova kwatwa po oshivike sha dja ko eshi vati va denga nomamanya ndele tava tu omumwainamati nombele fiyo ta xulifa.
Oshiningwanima osha ningwa oshivike dja ko molukanda Kuvukiland modoolopa yaTsumeb efimbo loufiku.
Nakufya okwa tongolwa oye David Uiseb omukalimo womolukanda Kuvuiland.
Omukulunhu wopolifi moshitukulwa shaShikoto, Commissioner Ndafudha Iifo okwa koleka onghundana e i onghela.
Opolifi oya hokolola tai ti ovalumenhu ava vatatu ve li ovamwainafana okwa li vaya keendingosho ndele tava tokelwa tava nu omalodu.
Otaku hokololwa kutya eshi ve li mondjila yokundja keendingosho ova tameka okutanguna nanakufya.
Opolifi oya hokolola tai ti omufekelwa umwe okwa kufa emanya ndele ta denge nanakufya ndele de li denge po. Natango vati, konima yokafimbo omufekelwa omutivali okwa kufa mo ombele ndele ta tu nakufya monhulo.
Opolifi oya hokolola tai ti fiyo opapa ka pe na ouyelele kutya ovamainamati ava ova dipayela shike mukwao.
Opolifi oya kumaida oshiwana opo shi xulife po okutanguna ngeenge sha nwa omalodu ile shi li keendingosho molwaashi osha nyika oshiponga.
-fhamalwa@nepc.com.na
The post Ovalumenhu vavali medipao lamumwaina tava kala mokakuma appeared first on New Era.