Warbixin baaritaan ah oo uu baahiyey telefishinka Al Jazeera ayaa iftiimisay dhibaatada bani’aadannimo ee qoysas rayid…
21 October, 2026
Warbixin baaritaan ah oo uu baahiyey telefishinka Al Jazeera ayaa iftiimisay dhibaatada bani’aadannimo ee qoysas rayid ah ay sheegeen inay kala kulmeen duqeymo cirka ah oo Mareykanku ka fuliyey agagaarka degmada Jamaame ee gobolka Jubbada Hoose, bishii Nofeembar 2025, Warbixinta oo la daabacay 20-kii Oktoobar 2026 ayaa diiradda saartay dad sheegay inay ku waayeen xubno qoysaskooda ka tirsanaa, carruur dhaawacyo culus soo gaareen iyo dad ku khasbanaaday inay ka barakacaan deegaannadii ay ku noolaayeen.
Warbixintan ayaa dib u soo nooleysay doodda ku saabsan saameynta hawlgallada cirka ee Mareykanku ka fuliyo Soomaaliya, gaar ahaan ilaalinta nolosha dadka rayidka ah iyo sida loo baaro khasaaraha ka dhasha weerarradaas, iyadoo Aljazeera sheegtay in duqeymaha Mareykanka ee Soomaaliya ay kordheen muddadii uu Donald Trump hoggaaminayey dowladda Mareykanka, inkasta oo tirada duqeymaha iyo xogta khasaaraha ay ku kala duwanaan karaan ilaha dabagalka ee kala duwan.
Hooyada lagu magacaabo Maryan Xaaji Cabdi Guuleed ayaa Al Jazeera u sheegtay in saddex ka mid ah lixdeeda carruur ah ay dhaawacmeen intii ay socdeen duqeymaha. Wiilkeeda Cabdulqaadir Saalax, oo xilligaas toddoba jir ahaa, ayaa firir bir ah kaga haray jirkiisa, waxaana qoysku la kulmay dhibaatooyin la xiriira helitaanka adeeg caafimaad oo ku filan. Sidoo kale, Cali Aadan Boroow ayaa sheegay in xaaskiisa oo sagaal bilood uur lahayd iyo ilmihii ay sidday ay ku dhinteen weerarka, halka Nuur Cali Nuur uu sheegay in xaaskiisu ay dhaawacyo culus ka soo gaareen, kuwaas oo sababay inay naafo noqoto.
Dhanka kale, shabakad dabagal oo uu hoggaamiyo Xafiiska Qaramada Midoobay u qaabilsan Qaxootiga (UNHCR) ayaa diiwaangelisay dhimashada 12 qof oo rayid ah intii u dhexeysay 16-kii iyo 18-kii Nofeembar 2025, xilli ay socdeen dagaallo iyo duqeymo ka dhacay agagaarka Jamaame. Shabakadda ayaa sidoo kale sheegtay in 22,800 oo qof ay ka barakaceen magaalada iyo deegaannada ku dhow saddex maalmood gudahood. S
Taliska AFRICOM ayaa sheegay in qiimeyntu aysan helin caddeymo ku filan oo muujinaya in hawlgallada Mareykanku ay u badan tahay inay sababeen khasaaraha rayidka ee la soo sheegay, iyadoo sheegtay inay dib u eegi karto natiijada haddii xog cusub la helo. Arrintan ayaa muujinaysa baahida loo qabo baaritaan hufan oo lagu kala caddeeyo khasaaraha, cidda mas’uulka ka ah iyo tallaabooyinka loo qaadayo dadka dhibaatadu gaartay