Kular ban shimkhia ban pynurlong ia ki mat jingdawa jong ka Jylla hadien ba la pyniasoh bad ka BJP
Shillong Risaw 18: U MLA ka BJP na Ranikor Constituency u Bah Pius Marwein ula ai khublei ia u Lamphang ka ïingdorbar thawaiñ ka Jylla halor ka jingai jingithuh ia ka jingleit pyniasoh jong ki 8 ngut ki MLA sha ka seng BJP.
“Nga ai khublei ia u Lamphang ka ïingdorbar thawaiñ halor ka jingithuh ia ka jingleit pyniasoh jong ki 8 ngut ki MLA ba ka long kaba iaid katkum ka aiñ bad hapoh ki kyndon jong ka Tenth Schedule jong ka riti synshar ka ri” la ong u Bah Pius Marweiñ ha ka kyrwoh khubor.
Ula ong ba ka jingleit rung ki 8 ngut ki MLA sha ka seng saiñ pyrthei kaba heh paid tam ha ka pyrthei baroh kawei, kam dei ka lynti kaba suk, haba ka Meghalaya kadei ka jylla kaba rit bad kaba jwat bha, haba poi sha u pud jong ka jingiakren ban iasaid halor ki mat kiba iadei bad ka jylla khamtam haba ka don ruh ka sorkar kaba skhem ha ka jylla.
U Bah Pius uba la jop arsien kum u MLA bad MDC udei uba la donbynta bha ha ka kam politik mynta lah palat ia ka 20 snem, ula ong ba ka long pat kaba eh ban pynurlong ia ki jingkular kiba la khlei da ki nongialam ka Jylla ha kaba iadei bad ki mat kiba hap hapoh ka jingpyniaid jong ki aiñ jong ka Sorkar Pdeng.
“Kane ka kam kala long ruh kaba kham jwat shuh shuh haba ym shim la iadonbynta lang bad ka ‘National Party’ ha ka Sorkar Pdeng. Hynrei ki nongialam ka BJP ha ka Sorkar Pdeng kila long kiba kloi ban sngap ia ki jingpynsngew ki jong ngi khamtam halor ki mat jingdawa kiba kongsan kiba kynthup ia ka MRSSA, jingpynrung noh ia ka Ktien Khasi bad Garo ha ka Eight Schedule, jingtih dewiong, ban pynkynriah noh ia kiba sah ha Them Metor bad ban ai ia ka kyrdan ‘Minority Status’ ia ka Seng Khasi, Sein Raij” ula ong.
U Bah Pius ula ong, “Hadien katto katne bnai jong ka jingiakren ha Delhi, khatduh khatwai haba u Myntri Kam Pohiing ka ri u Amit Shah, ula ai ia ngi ia ki jingkular halor ki 5 tylli ki mat jingdawa jong ka jylla, ngi lah pdiang kum ka kynhun bad ngi shaniah ruh ia ka jingkular kaba la ai da u nongialam uba radbah ha ka ri bad khatduh kila rai ban pyniasoh noh sha ka seng BJP hapoh ka jingialam u Myntri Rangbahduh ka ri u Narendra Modi ji”.
“Ngi dap ruh da ka jinglyngngoh ban iohi ba ka jingiakynduh ia ki nongialam ka Sorkar Pdeng ha Delhi kam dei satia kaba eh, kumba la long ha ka por ba synshar ka Congress, ha kaba ki nongialam na ka Jylla jong ngi, ki hap ban ap da ki snem ban iakynduh tang ia uwei u Myntri ka Sorkar Pdeng” la ong u MLA bad MDC ka BJP na Ranikor Constituency.
U Bah Pius ula ong, ba ka kynhun ka pynpaw ruh ia ka jingsngewnguh ia u Sambit Patra, MP uba khmih ruh ia ka BJP Northeast uba la leh ia ka bynta kaba khraw ha kaban sngap ia ka jingdawa ka jongki bad ban rah ruh sha ki tnad kiba dei khmih.
“Khatduh, ngi kyrmen skhem ba ngin trei ryngkat bad ka paralok kiba donlang ha ka NDA ha ka Sorkar Jylla khamtam bad u Myntri Rangbah u Conrad Sangma khnang ba ngin lah ban iatreilang ha kaban wanrah ia ki kam pynroi ha ka jylla” ong u Bah Pius bad ka bynrap, ba shen baroh 8 ngut ki MLA kin leit ban iakynduh ia u Myntri Kam Pohiing ka Ri u Amit Shah bad kiwei kiwei ki Myntri ka Sorkar Pdeng ha Delhi khnang ba kin ioh iakren halor ki projek kiba bun na ka bynta ka Jylla.
U Bah Pius ula ong ruh, ba ka jingbuh hakhmat eh ka jongki ha kane ka khyllipmat kaba mynta kadei ban phaikhmat sha ki thaiñ nongkyndong bad ban pynsngewthuh ia ki paitbah shaphang ki skhim kiba bunjait jong ka Sorkar Pdeng bad ka jingmyntoi kaban iarap ia ki paitbah kiba shong ba sah ha ka thaiñ nongkyndong.
Pule ruh : Ïashimbynta u Myntri Rangbah ha ka jingrakhe dap 15 snem ka Mawkyllei College
Peit ruh
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
The post Sngewnguh u Bah Pius ia u Lamphang halor ka jingai jingithuh appeared first on Hub News.