Ռուսական զորքերը գիշերը հարվածել են ուկրաինական քաղաքներին։ Կիևում բազմահարկ շենքը մասամբ ավերվել էր։ Փրկարարները փլատակների տակից դուրս են բերել երկու մարդու դի, հայտնում է «Ազատության» ռուսական ծառայությունը:
Խարկովի մարզի Կորոտիչ գյուղում անօդաչու թռչող սարքերը հարվածել են մասնավոր տանը։ Բնակիչները՝ 81-ամյա կին և 83-ամյա տղամարդ, զոհվել են։ Տասնմեկ մարդ վիրավորվել է, այդ թվում՝ երկու ամսական տղա և ութ տարեկան աղջիկ։ Խարկովի մարզային պետական վարչակազմի ղեկավար Օլեգ Սինեգուբովը հայտնել է, որ նրանց բժշկական օգնություն է ցուցաբերվել։ Ընդհանուր առմամբ, տասնմեկ բնակելի շենք է վնասվել։
Պոլտավայի մարզի Կրեմենչուկ քաղաքում Միխայլո Օստրոգրադսկու անվան համալսարանի տարածքում ռուսական օդային հարվածի հետևանքով հրդեհ է բռնկվել ակադեմիական շենքի հինգերորդ հարկում: Ուկրաինայի արտակարգ իրավիճակների պետական ծառայության նախնական տվյալներով՝ վիրավորվել է երեք մարդ, այդ թվում՝ 16-ամյա մի տղա, որը հոսպիտալացվել է:
Պոլտավայում հրետակոծությունը հրդեհներ է առաջացրել վարչական շենքում և պահեստում։
Զապորոժիեի մարզային պետական վարչակազմի ղեկավար Իվան Ֆեդորովը հայտնել է, որ Զապորոժիեի և Զապորոժիեի շրջանի վրա ռուսական հարձակումների հետևանքով մեկ մարդ զոհվել է, ևս վեցը՝ վիրավորվել։
Չերկասիի մարզային պետական վարչակազմի ղեկավար Իհոր Տաբուրեցն էլ հայտնել է, որ հարձակման է ենթարկվել նաև Ումանը։ Ավերվել է մասնավոր տուն, մեկ տղամարդ վիրավորվել է. նա հրաժարվել է հոսպիտալացումից։ Անօդաչու թռչող սարքերը նաև հարվածել են հիպերմարկետի շենքին և դրա տարածքին՝ հրդեհ առաջացնելով։
Օդեսայի նահանգային վարչակազմի ղեկավար Օլեգ Կիպերը հայտնել է ռուսական անօդաչու թռչող սարքի հարձակման մասին։ Վնասվել են էներգետիկ օբյեկտներ և մասնավոր սննդի վերամշակման գործարան։
Ուկրաինայի ռազմաօդային ուժերի հրամանատարության տվյալներով՝ հոկտեմբերի 21-ի գիշերը Ռուսաստանը հարձակվել է Ուկրաինայի վրա «Իսկանդեր-Կ» թևավոր հրթիռներով և 186 «Շահեդ» տիպի անօդաչու թռչող սարքերով, այդ թվում՝ 88 կործանիչով, S8000 «Բանդերոլ/Դան-Տ, «Գերբերա» և «Պարոդիա» անօդաչու թռչող սարքերով։
Ռուսական զորքերն ամեն օր հրետակոծում են Ուկրաինան։ Ռուսական հրամանատարությունը պնդում է, որ հարվածում է միայն ռազմական թիրախներին։ Կրեմլը չի մեկնաբանում քաղաքացիական բնակչության շրջանում զոհերի կամ քաղաքացիական ենթակառուցվածքների ոչնչացման վերաբերյալ տվյալները։