Kajinarangko manderangna janggi tangani cholko on·na jakkalgen ine CM ku·rachaka
SHILLONG: District Mineral Foundation (DMF)-ni bilsi 10 gapaniko Budbar salo, Shillong songjinmani State Convention Centre-o maniangaha aro ia program-ko ong·atanio a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia program-ko ong·atanio a·dokni Chief Minister, jinmana aganprakangengon, DMF-ni ning·o dingtang dingtang kamrangko ka·anichi man·enggipa tangka paisarangko, a·dokni manderangna pangkamgipa janggi tangani cholrangko on·na jakkalangkugen ine ku·rachakaniko on·angaha.
Koelarangko bikotaniara a·dokni economy-na mongsonggipa pangchakani ong·engon, ia kamrangoniko man·enggipa kajinarangko a·dok sorkari, manderangna pangkamgipa janggi tangani cholrangko on·na gita jakkalskana miksongenga ineba ua aganaha.
Batanggimin bilsi 10-ni gisepo ia Foundation, Meghalaya a·doko gong kror 181 tangkarangko koros ka·aha aro a·doko ra·gatgipa ming 923 project-rangoni ming 542 project-rangkode matchotaha ineba ua aganaha.
Ia tangkarangko, classroom-rangko rikna, sanchakram biaprangko taridapna, ringani chirangko on·na, songadam nokadamrangona jal·langrangko tarina aro samtangtango ong·telaigiparangko ripingna jakkalaha.
DMF-ni ning·o man·enggipa tangka paisarangko, jolo songdongenggipa manderangna, mongsongbate koela bikotgipa biaprango, janggi tangani cholrangko on·na jakkalna nangenga ine janapangengon, dingtang dingtang a·jarango ra·gatgipa kamrang, jekai Nengmandalgre-o eco-tourism park aro bija bitchi karkanako kuliani, Ri Bhoi a·jao muga jo·ong jilchakani aro weaving centre-ko kuliani baksana gipin kamrangni gimin Chief Minister janapangaha.
DMF-ni ning·o cha·ani tariani karkana, tourism, bading chiwalani aro uandakgipa kamrangchi manderangna janggi tangani cholrangko on·na nangani giminba Chief Minister aganangaha.
Mongolbar salo, Shillong songjinmani Ward’s Lake-o kuligipa Meghalayan Age Pavilion-ni gimin janapangengon, ian a·doko kuligipa bading chiwalani kamrangko aro a·doko man·gipa bosturangko ra·dona sorkarini niksamsoaniko mesokani ong·a ine Chief Minister parakataha.
Ia Meghalayan Age Pavilion-o kuligipa dokkan ge·antian a·dokni bading chiwalgiparang ong·a aro iano palenggipa bostu mingantian a·doko songdongenggipa manderangni tarigimin bosturangan ong·a ineba ua aganaha.
DMF-ni tangka paisarangko manderangni namgnina nambate jakkalna man·na gita cholrangko name nichinaba Chief Minister, dingtang dingtang a·jani deputy commissioner-rangko didiangaha aro man·a dipet dingtang dingtang cholrangchi a·dok sorkari, nangchakegipa department-rang aro Chief Minister-ni Secretariat-ba dakchakanirangko on·gen ine pilak a·jarangnan ku·rachakaniko on·angaha.
Je a·jarangon DMF-ko songkuja ba a·jarangon koelarangko bikotengoba DMF-rang name kam ka·kujaenga, uandakgipa a·jarango obostarangko nipiltaichina aro DMF-ko chalaina nanga gita ja·kurangko de·china Chief Minister didiangaha.
DMF-ni ning·o kamrangko ka·engani gimin ua East Jaintia Hills aro gipin a·jarangoba mittelpilangaha aro pilak deputy commissioner-rangkon, project-rangko somoi gita matchotatchina aro tangka paisarangko name jakkalchina Chief Minister didiangaha.