ENGELA- Umwe womovakwanedimo vanakufya omunyekadi mutivali Penehupifo Pohamba okwa koleka kutya nakufya ota fudikwa Olomakaya loshivike tashi ya.
Omunyekadi Pohamba otaka fudikwa pomaendo ovakwanedimo vaye komukunda Okanghudi moshitukulwa shaHangwena.
“Oshitufidimbuluko shotete otashi ningilwa moWindhoek noshitivali otashi ya okuningilwa keumbo Etitano loshivike tashi ya kOkandhudi opo nee efudiko ta li shikula ko mOlomakaya,” umwe womovakwanedimo a kwashilipaleka.
Omanga ovakainhu ve li kewalanda li li mEngela moshitukulwa shaHangwena ova tumbaleka nakufya omunyekadi omitivali Penehupifo Pohamba molwoilonga iwa a longa eshi e va tungila ewalanda omo hava di paife ngeenge va ka pulumuna.
Ewalanda onhele ya tungwa i li popepi noshipangelo shaNgela hai kwafele ngeenge ovakainhu tava fetwa opo va ha ende vali oinano ile. Onhele e i oya kwafela ovakainhu vahapu unene tuu ovo hava di komikunda dokokule molwaashi paife ngeenge oshifeta sha fiki ohava hangika ve li nale popepi noshipangelo.
Mopaife, mewalanda omu na ovakainhu 65 ve uya okuteelela okupulumuna.
Ewalanda e li ola tungwa nokwa li la patululwa pambelewa omudo 2009 kunakufya omufiyekadi Pohamba.
Pohamba okwa xulifa mexuliloshivike koshipangelo shopaumwene koWindhoek mepipi lomido 78.
Ota fudikwa Olomakaya loshivike twa finda. Loide Hashali o u a kala eemwedi mbali mewalanda okwa hokolola ta ti ova pandula eshi paife ve li monhele iwa muna olusheno osho yo omeva.
“Ngeno meekulu Pohamba ka li po ngeno osho natango oha tu nangala moubashu ngeenge twe ya okuteelela okupulumuna,” ta ti.
Otaku hokololwa kutya nale ovanhu okwa li hava nangala ashike momiti ile ve li moubashu ngeenge vaka teelela okupulumuna.
Pefimbo Kundana a taalela po ewalanda onghela, ovakainhu va yooloka ova tanga meekulu Pohamba tava ti okwa li omukainhu ena olukeno noshiwana molwaashi okwa longa nondjungu fiyo ewalanda e li ta li tungwa.
Pohamba okwe li hongela oupangi keifano kondje yoshilongo pefimbo loita nokonima eshi a alukila moshilongo okwa tota po eeprograma dihapu dokuyambidida oomeme osho yo ounona.
Vahapu ove mu hokolola kutya okwa danga onghandangala ya kula okuyambula po oshikondo shouhaku.
Martha Daniel a dile komukunda Onengali okwa ti meekulu Pohamba okwa fiya po oshihopaenwa shiwa sha pumbwa okulandulwa kovaleli va yooloka.
Okwa ti kewalanda ove li ko va taalela omashongo ngaashi oikulya i na i wana osho yo odalate yoluumbo ya teka po osho tashi eta eembudi. Okwa pula moshiwana opo shi yambidide ewalanda lavo, okuvatula ko oluumbo lodalate.
Tava ti ekwafo lodalate kewalanda ota li ulike olukeno ngaashi naana meekulu Pohamba kwa li ena olukeno noshiwana.
The post Efiku lefudiko lomunyekadi Pohamba la shiivifwa… va pandula omunyekadi eshi e va tungila ewalanda appeared first on New Era.