Puja chutti ja·man jingjengataniko u·iatgen
SHILLONG: Advocate General Amit Kumar-ko ra·galchina dabie, a·dokni ukilrang jingjengattaina tik ka·anagaha aro AG-ko mangrakbatatna sorkarini ra·gatgipa gital niamkoba jegale, kachario badi ka·doangaha.
Meghalaya Panel Advocate (Empanelment & Engagement) Guidelines, 2026-ko ja·rikna gita September-ni 16 tariko a·dok sorkarini u·iataniko jegale, Shillong Bar Association (SBA) aro High Court of Meghalaya Bar Association (HCMBA), kachario PIL ka·doangaha.
“Advocate General-ko ra·galchina dabie chinga jingjengattaina gita pilak membor-rang baksa tom·e chanchirimtaiaha aro ja·mano pilakan jingjengattaina nangnikaniko paraktokaha,” ine SBA-ni assistant secretary N Shyambor Singh Marpan, tom·aniko ong·atani ja·man, kobor ra·timgiparangna aganaha.
Marpan-ni parakatani gitade, Bar association-ni membor-rang, re·anggipa September jani 2 tariko skanggipa a·dokni Deputy Chief Minister-ko gronge agangrikon, AG Amit Kumar, antignina kachario mikkangpajawa ine ku·rachakaniko on·aha aro ia ku·rachakanikode chu·sokataba chu·sokataha.
“Uni ja·man chingko September-ni 16 tariko a·dokni Chief Minister, an·tangni nokona okamatenba, iani bidingo niatna ku·rachakaniko on·aha. Ua October 7 tarikona somoiko bi·ahani gimin chinga uni bi·a gitan somoiko on·aha aro chingni kam dontonge jingjengatanikoba dontongchengaha,” ine SBA-ni assistant secretary aganaha.
Indake ong·genchimoba, AG ia songgigrikaniko pe·aha ine Marpan matnangaha.
“September 16 tarikni ja·man Amit Kumar, High Court-osan ong·aigija gipin kacharirangoba mikkangpakuaha aro Chief Minister-ni ching baksa ku·rachakgrikako pe·aha. Uni gimin chinga September 30 tariko tom·aniko ong·ate, kam dontongatpiltaina tik ka·aha,” ine ua aganaha.
Indake ong·engon, da·o Puja chuttini ja·man kacharirangko kulipilahaon, ukilrangni jingjengataniko jinmana parakatgen ine SBA-ni assistant secretary aganaha.