Արևմտյան արբանյակային ինտերնետային համակարգերը, ինչպիսին է Starlink-ը, օգտագործվում են երկրների ներքին գործերին միջամտելու և այնտեղ անօրինական բողոքի ցույցերը համակարգելու համար, ռուսական «ՌԻԱ Նովոստիին» ասել է Ռուսաստանի փոխարտգործնախարար Ալեքսանդր Ալիմովը։
«Արևմտյան ցածր ուղեծրային արբանյակային ինտերնետային համակարգերը լայնորեն օգտագործվում են պետությունների ներքին գործերին միջամտելու համար: Բաժանորդային տերմինալներն ապօրինաբար ներմուծվում են զարգացող երկրներ և օգտագործվում անօրինական բողոքի ցույցերը համակարգելու համար», - Գլոբալ թվային երկրորդ ֆորումից հետո գործակալությանն ասել է նա:
Դիվանագետն ընդգծել է, որ Իրանն այս խնդրի մասին ուղիղ է հայտնում ռուսական կողմին, քանի որ 2022 թվականից ի վեր պարբերաբար բախվում է նման դեպքերի։
«Այս հարցին առավելագույն ուշադրություն հրավիրելու համար մենք անցյալ տարվա վերջին ՄԱԿ-ի Անվտանգության խորհրդի նիստ անցկացրինք «Արրիայի բանաձևի» շրջանակում [Անվտանգության խորհրդի անդամների ոչ պաշտոնական հանդիպումներ, որոնք նախաձեռնել էր նրանցից մեկը - խմբ.]: Մենք այս հարցը բարձրացրինք նաև Գլոբալ թվային ֆորումում», - եզրափակել է դիվանագետը:
Starlink-ն արբանյակային ինտերնետային համակարգ է, որը ստեղծել է ամերիկյան SpaceX ընկերությունը (հիմնադրել է ամերիկացի գործարար Իլոն Մասկը)։ Այն ինտերնետ է տրամադրում արբանյակների միջոցով՝ նույնիսկ այն վայրերում, որտեղ սովորական ինտերնետային կապը հասանելի չէ կամ թույլ է։ Starlink-ը Հայաստանում հասանելի է 2025 թվականի մարտից:
Ավելի վաղ ՌԴ Արտաքին գործերի նախարարության միջազգային տեղեկատվական անվտանգության վարչության պետ Բորիս Վասիլևը «ՌԻԱ Նովոստի»-ին ասել էր, որ Starlink համակարգերի օգտագործման հետևանքով տասից ավելի երկրներ են տուժել։
«Արդեն կան տասից ավելի նման երկրներ։ Ցավոք, ոչ բոլորն են պատրաստ բացահայտ խոսել, բայց փակ երկխոսության ժամանա նրանք մեզ հետ կիսվում են, որ իրենք նույնպես դառնում են այս իրավիճակի զոհը։ Իրավիճակի ողջ ծավալը իմանալով՝ կարող եմ ասել, որ խնդրի մասշտաբները հսկայական են», - ասել էր Վասիլևը։