Farmaajo oo ka horyimid jadwalka doorashada, kuna baaqay heshiis siyaasadeed

Madaxweynihii hore ee Soomaaliya, Maxamed Cabdullaahi Farmaajo, ayaa si adag uga horyimid go’aanka Guddiga Madaxa-bannaan ee Doorashooyinka iyo Soohdimaha Qaranka ee ku saabsan hannaanka doorashooyinka dalka, isagoo ku eedeeyey Madaxweyne Xasan Sheekh Maxamuud inuu waddo qorshe doorasho oo aan heshiis siyaasadeed lagu ahayn.

Farmaajo ayaa sheegay in hannaanka uu ku tilmaamay is-doorashada uu halis gelinayo dowladnimada iyo mustaqbalka Soomaaliya, isla markaana uu sababi karo doorashooyin isbarbar socda iyo isku dhacyo hubeysan, isagoo xusay in aan masiirka siyaasadeed ee dalka lagu go’aamin karin hannaan hal dhinac ah ama rabitaanka shaqsiyaad gaar ah.

Madaxweynihii hore ayaa sidoo kale ku eedeeyey Xasan Sheekh inuu doonayo inuu qabto doorasho aan heshiis lagu ahayn, ayna qayb ka ahayn Dowlad Goboleedyada iyo mucaaradka siyaasadeed, wuxuuna tallaabadaasi ku tilmaamay mid uu u arko mid ka hor imaanaya dastuurka iyo wada-tashiga siyaasadeed, isagoo ku dooday in tallaabooyin hore oo la xiriiray khilaafaadka maamul-goboleedyada ay sababeen isku dhacyo.

“Hannaanka is-doorashada ee uu qaatay Madaxweynweynaha muddo xileedkiisa dhammaday, waxa ay halis gelinaysaa dowladnimada iyo mustaqbalka dalka, waxa ayna horseedaysaa doorashooyin isbarbar socda iyo dagaallo sokeeye oo dalka ku baaha”, Ayuu yiri Farmaajo.