ONGWEDIVA- Ovanhu vena outala wokulandifa oikulya komutumba wopaungoba oo u li mOngwediva ova hokolola tava ti ova pandula eshi va mona omhito yokulandifa oilandifomwa yavo molwaashi eshi otashi va etele oyuuyemo.
Ova hokolola tava ti osha fimana ngeenge pe na oindingili yoludi e li opo epangelo li kale ta li yandje eemhito kovanangeshefa va shona va landife opo ku xwaxwamekwe nokuyambula po eengeshefa davo.
Omutumba ou owa tamekele Omaandaxa notau xulu mongula.
Owa patululwa pambelewa kuMinista womauyelele, nomakwatafano opaungoba Emma Theofelus.
Omahangano a yooloka mwa kewatelwa oshifokundaneki sho New Era oku li taa kufa ombinga komutumba wopaungoba okutopolafana ouyelele nounongo woipambele ya nyika oungoba.
Oshi li oshikando shotete monooli ta mu ningwa omutumba woipambele yopaungoba.
Rosalia Helao ou e li ta landifa oikulya komutumba okwa hokolola ta ti okudja efiku lotete omutumba wa tameka ongeshefa yaye otai ende nawa.
“Pefimbo lomusha ohandi ya kula ovanhu vahapu ve ya okulanda oikulya yavo osho yo oikunwa. Osha etela nge omukumo nolupandu shaashi e i oyo omhito iwa okulonga okamaliwa ketu,” ta ti.
Okwa yelifa ta ti elalakano lokulandifa oikulya komutumba okulonga oshimaliwa shokufutila ounona vaye ofikola nosho tuu oipumbiwa yomeumbo ya yooloka.
Helao okwa ti natango okwa kufa ombinga okulandifa oikulya komaulikilo oipindi mOngwediva, onghee eshi osha yambula po ongeshefa yaye.
“Paife ondi na ounongo wokuteleka osho yo okuyakula nawa oshiwana. Ohandi lalakanene okukala dingi mokuteleka eendja diwa shaashi eshi otashi nane ovanhu va kale tava lande oikulya kuame.
Telena Mukundukwa okwa ta ti omhito yokulandifa okulya komutumba ou otai kwafele okulwifa ondjala noluhepo.
“Ngeno ka pa li omutumba o u, ngeno ina tu mona omhito yokulonga oshimaliwa shetu. Natango e i omhito iwa okushakeneka ovanhu va dja komahangano a yooloka nokukala va shiiva eengeshefa detu,” ta ti.
The post Omutumba wopaungoba we va etela oyuuyemo appeared first on New Era.