© APA | Ermənistanın Baş naziri Nikol Paşinyan
22 oktyabr 2026 13:06 (UTC +04:00)
Ermənistanın Baş naziri Nikol Paşinyan Konstitusiyaya dəyişikliklər və Azərbaycanla sülh sazişinin imzalanması məsələləri ilə bağlı növbədənkənar seçkilərin keçirilməsi ehtimalını istisna etməyib.
Ermənistan mediasının məlumatına görə, Baş nazir bildirib ki, yaxın vaxtlarda Konstitusiya layihəsi dərc olunacaq, ictimai müzakirələr başlayacaq və sənəd parlamentə təqdim ediləcək.
Paşinyan müxalifəti bu məsələnin vacibliyinə inandırmağa çalışacaqlarını, bunun nəticə verməyəcəyi təqdirdə, digər ssenariləri, o cümlədən növbədənkənar seçkilərin keçirilməsini nəzərdən keçirəcəklərini deyib.
“Biz müxalifətdəki həmkarlarımızı bunun Ermənistan dövlətinin mövcudluğunun təmin edilməsi məsələsi baxımından vacib və prinsipial məsələ olduğuna inandırmağa çalışacağıq. Əgər bu, nəticə verməsə, növbədənkənar seçkilərin keçirilməsi ehtimalı da daxil olmaqla, digər ssenariləri nəzərdən keçirəcəyik”, – Baş nazir bildirib.
O, Konstitusiyaya dəyişikliklər etmək və Azərbaycanla sülh sazişini imzalamaq vədini Ermənistan vətəndaşlarına verdiyini xatırladıb.
“Əgər Ermənistan xalqı bu vədin yerinə yetirildiyini görmək istəyirsə, bunu xalqla birlikdə həyata keçirməliyik. Əgər xalq bu vədin yerinə yetirildiyini görməsə, müəyyən məqamda mənim siyasi missiyamın başa çatdığı qənaətinə gəlmək olar. Buna görə də bu, mənim üçün prinsipial məsələdir”, – Paşinyan vurğulayıb.
