OTJIWARONGO- Omupresidente Netumbo Nandi-Ndaitwah okwa indila omalelo opamifyuululwakalo opo a longele kumwe okukandeka omahepeko omomaumbo osho yo oimbuluma yomaludi a yooloka.
Edi okwe di popya moshipopiwa shaye sha leshwa kOmupedupresidente Lucia Witbooi Omaandaxa komutumba womalelo opamifyuululwakalo u li kOtjiwarongo. Komutumba ou, oku na ovaleli vopamifyuululwakalo da yooloka.
Ovaleli otava kundafana oimbale yopamifyuululwakalo osho yo kombinga yomashongo aa taalelwa.
Paife ngaha oshi li oshikando 27 omutumba ou tau ningwa, noha u ningwa omundo keshe. Nandi-Ndaitwah okwa ti oshiwana osha taalela omashongo opanghalafano ngaashi omahepeko omomaumbo, oimbudi woimuna, oiponga yomeendjila, oudu wopaunghundi nosho tuu. Okwa yelifa ta ti oupyakadi ou ota kandekwa ashike ngeenge omalelo opamifyuululwakalo taa dana onghandangala ya kula okuxwaxwameka oshiwana shi xulife po okulonga oimbuluma. “Longeleni kumwe nopolifi, nepangelo koikondo ya yooloka osho yo oshiwana momidingonoko deni opo mu kandeke omahepeko omomaumbo,” ta ti.
NNN okwa kumaida omalelo opamifyuululwakalo opo a kale taa longo pauyuuki okukandula po eenhamanana momidingonoko davo.
“Kaleni ta mu xwaxwameke ombili noukumwe molwaashi eshi otashi kwafele oshiwana shi longele kumwe sho shi kale shina ombili,” ta ti.
Okwa yelifa ta ti ngeenge oshiwana shina ombili noukumwe nena otashi kwafele okukeelela ovanhu tave li denge ile omalidipao moshiwana.
Omupresidente okwa pula omalelo opamifyuululwakalo opo a eta po eeprograma odo tadi yandje ehongo kombinga yeenghulunghedi kovanyasha nounona.“Osha fimana ngeenge oshiwana sha fimaneka omifyuululwakalo davo neenghulunghedi shaashi eshi otashi xwaxwameka ovanhu va kale va fimanekafana,” ta ti. Okwa ti epangelo ota li twikile okuyambidida omalelo opamifyuululwakalo molwaashi ota dana onghandangala ya kula okukaleka po efimano lomifyuululwakalo.
Okwa yelifa ta ti epangelo ola pumbwa okuyambididwa komalelo opamifyuululwakalo ngeenge tashi ya pokuyandja eenhele domadu unene tuu peenhele tapa ningwa eemina, eenhele dovapashioni nosho tuu omaxumo komesho a yooloka. “Omalelo opamifyuululwakalo naa kale taa kufa ombinga meeproyeka dounamapya ngaashi okuninga oikunino osho yo okuyandja edu kepangelo,” ta ti.
Okwa weda po ta ti eeproyeka dounamapya oda fimana shaashi otadi yandje eemhito koshiwana shi li longe oikulya yavo vene osho yo okukondjifa ondjala noluhepo. “Onda hala okumona omalelo opamifyuululwakalo taa yandje eenhele dedu dokutunga eefikola, oipangelo, oupale vomaudano nosho tuu omandiki a yooloka,” ta ti.
NNN okwa popya natango ta ti omalelo opamifyuululwakalo naa kale e na oukumwe noshiwana shimihoko da yooloka nelalakano lokukwashipaleka kutya ka pe na okulongifa oukwamuhoko.
Moshipopiwa shaye, Minista womayambulepo eedoolopa nokomikunda James Sankwasa okwa kumaida omalelo opamifyuululwakalo opo a kale taa landula omilandu dopamifyuululwakalo odo da kala ko nale ngeenge ta kuulikwa omunhu ou talele oshitunda.
Okwa ti eshi osha fimana molwaashi otashi kalele opo ovanhu vaha kondjele vali oipundi yokulela.
“Ka le ni nombili ndele ta mu landula omilandu domondjila. Ka le ni ta mu ulike oshihopaenenwa shiwa moshiwana,” ta ti.
-fhamalwa@nepc.com.na
The post Longeleni kumwe okukandeka omahepeko omomaumbo -NNN appeared first on New Era.