AMPATI: Sombar salo, SOUTH West Garo Hills a·jani Mahendraganj Community Health Centre (CHC)-ni ning·o ong·gipa Barmanpara songo , Human Development Leadership Programme (HDLP)-ko ong·atangaha. Ia ong·atanggipa program-o healthcare dolrang, Block HDLP dolrang aro skulni skigiparang apsan bakko ra·angenba, bi·sarangni dal·roroanio nangchongmotgipa cha·a ringanirang, songsalni an·seng baljokani aro silroro namroroani kamrangni bidingo chanchirimangaha.
Ia ong·atanggipa program-o Mahendraganj CHC aro MCH-ni Medical Superintendent-cum-Senior Medical and Health Officer-in-Charge, Dr. Noor Ain Khan baksana Block HDLP Team, Najma Parvin, ASHA Facilitator, aro jolni skulni skigiparang bakko ra·angaha.
Program-o,bi·sarangni dal·roroanina salantio namgipa cha·a ringanirangni gamchatgipa ong·ani, bi·sarangni silroro namroronio dal·roroanina namgipa cha·a ringanina didianiko on·ani aro songsalni an·seng baljokanina kam ka·anirango chagrongenggipa dingtang dingtang neng·nikarangni bidingo Anganwadi Workers (AWWs)-ni mongsonggipa ong·e bak ong·ani gimin chanchirimangaha. Chanchirimanganiko dakangao program-o bakko ra·anggiparang chagrongna nangenggipa neng·nikgiparangni bidingo agan-talatangan baksana mikkangchi neng·nikanirangko namatani cholrangni giminba agan-golpogrikanganiko dakangaha.
Program-o una agreba bi·sarangni an·seng baljokaniko namdapatanina, namgipa cha·a ringani bidingo mikrakataniko bilakbatatanina, healthcare dolrang, Anganwadi Workers, skigiparang aro songsalni manderangni nangrime kam ka·anian nangchongmotgipa ong·ani giminba mongsonggipa ong·e chanchirimanganiko dakangaha. Bon·kame songsalni dingtang dingtang neng·nikarangko nambate mikkangchakna aro namataniko ra·baanina, ku·mong nangrime kam ka·ani aro songsalni manderangni bak on·pani gamchatgipa ong·ani gimin agane programko matchotatangaha.