Elelo lodoolopa yaNgwediva ola holola kutya onhele yakula yokuli hafifa nokuuhala mOngwediva oi li pokupwa okutungwa paife.
Elelo lodoolopa ola ti onhele yomalihafifo oya tungwa eepelesenda 90 da pwa.
Edi oda kolekwa komupopiliko wodoolopa Ottilie Shingenge kutya onhele e i otai ka kala oyo yotete mOngwediva ya tungwa kelelo lodoolopa. Shingenge okwa ti ngeenge oya pu okutungwa, otai ka kala onhele yoku ombela ovakalimo vaNgwediva osho yo ovakalimo vedoolopa dopopepi.
Ta ti onhele e i otai ka kala yo ya wapala okuombela ovakwanedimo, ovaneumbo nomaludalo avo nokuhafela pamwe. Okwa twikila kutya onhele otai ka kala ina ongwena italala nawa nokunangala, okapale koudano woVolleyball, oundjuwo, onhele yokutula oushike pengeyo voye ngeenge wa hala okulya.
Shingenge okwa ti onhele yomalihafifo oya topolwa moinhimbu ya fika pu itatu oyo hai ufanwa kutya eephase melaka loshitaakumi.
Shingenge okwa holola kutya elelo lodoolopa yaNgwediva oli li pophase onhivali oyo i li peepelesenda 90.
Eshi otashi holola kutya ove na ko ashike eepelesenda 10 osho yo ophase yaxuuninwa okukala va mana onhele yomalihafifo. Vanyenga Daniela, omukalimo womodoolopa yaNgwediva okwa ti mOngwediva okwa kala mo eedula da fika po 24 paife ashike omhito yokudja meumbo eke li hafife ohe i mono ashike pefimbo loipindi yaNgwediva.
“Ngeenge oipindi yapu, omunhu ku na ashike apa ho dulu okuya uka fude po ile uka ude po ngaho okamhepo uli novapambele voye.
Paife ngaashi ndi na ovakwanedimo va hapu ngaha eshi ota shi penge omhito opo ndi dule okukala nda twala ovaholike vange konhele yomalihafifo, fyee tu dule oku ka hafela pamwe nawa tu na ombili osho yo eudafano liwa,” ta ti. Elise Shaanika oo naye eli omukalimo waNgwediva okwa ti ngeenge onhele oya pu okutungwa oko ta kala haka leshela.
Shaanika okwa ti otaka kala yo taka dana oudano waye wovolleyball konhele yomalihafifo shaashi opo ha shengelwa opo. “Eshi shiwa natango osheshi kutya omunhu oto dulu okutumba efiya loye, ndele toka yofa nande eembelela doye wa manguluka ove owuudite omhepo iwa.
Onda pandula elelo lodoolopa kexumokomesho eli shaashi natango omukalo o u otau ka kwafela mokunghonopeka osho yo oku hanginifa ovapambele vahapu.
Shingenge okwa ti oproyeka e i otai tungwa komwaalu weemiliona N$3,1.
-taimihaihambo2000@gmail.com
The post Onhele yomalihafifo mOngwediva i li pokupwa okutungwa appeared first on New Era.