Maxaa looga hadlay kulankii Madaxweyne Xasan Sheekh & Islaan Ciise.

Islaan Ciise Islaan Maxamed oo ka mid ah isimada dhaqanka Puntland ayaa xalay kulan kula yeeshay Madaxtooyada Soomaaliya Madaxweynaha Dowladda Federaalka, Xasan Sheekh Maxamuud, kaas oo looga hadlay arrimo ay ka mid yihiin dadkii dhawaan lagu dilay xeebaha Garmaal iyo Jiifle ee gobolka Nugaal.

Sida aan xogta ku helnay kulanka ayaa diiradda lagu saaray dilka 13 qof oo la sheegay in ciidamada Turkigu ay duqeyn ku dileen xeebaha Nugaal, iyadoo Islaanku dowladda Federaalka ka codsaday inay ka shaqeyso sidii caddaalad loo heli lahaa, isla markaana xuquuqdooda loo dhowri lahaa ehellada dadkii dhintay.

Dowladda Puntland ayaa horay u sheegtay in dadka lagu dilay xeebaha Nugaal ay ahaayeen kalluumeysato rayid ah, wuxuuna Turkiga ku eedeeyay inuu duqeyn ku dilay dad aan wax lug ah ku lahayn dagaal, dhacdadaasi oo dhalisay su’aalo la xiriira badbaadada kalluumeysatada, ilaalinta dadka rayidka ah iyo sida loo xaqiijin karo dhacdada.