Oktubre 21, 2026 12:41am GMT+08:00
SINULAT NI: GMA News
Bagaman hindi magla-land fall sa Pilipinas, inaasahan pa ring mararamdaman sa Huwebes, Oktubre 22, ang epekto ng Super Typhoon Rosal (international name: Champi), na posibleng maging kasinglakas ng Super Typhoon Uwan noong 2025, ayon sa PAGASA nitong Martes.
Sa ulat ni Ian Cruz sa “24 Oras,” sinabi ng state weather bureau na inaasahang tatahakin ni Rosal ang hilagang-silangang bahagi ng Luzon, partikular ang mga isla ng Batanes, sa Huwebes sa bilis na 25 kilometro kada oras.
“Maaaring maapektuhan itong mga northernmost islands ng Batanes group of islands. Maaaring pinaka-highest storm wind signal na maaaring i-raise ay Signal No. 3,” sabi ni PAGASA Administrator Nathaniel Servando.
“Sa hangin, in-expect natin na malakas dahil super typhoon ito. Signal No. 3, meaning more than 100 km/h, of course, kung tingnan natin ang satellite image kanina, malawak din ang sinasakupang cloud bands nito, kaya ine-expect natin na malakas ang pag-ulan,” dagdag niya.
Ang Super Typhoon Rosal ang ika-18 bagyong pumasok sa Philippine Area of Responsibility (PAR) ngayong 2026.
Ayon sa PAGASA, posibleng maging kasinglakas ni Uwan si Rosal. Nag-landfall si Uwan sa Aurora noong Nobyembre 2025, na nagdulot ng malalaking alon at matinding pinsala dahil sa storm surge.
Inaasahan ding magdudulot si Rosal ng alon na may taas na 1.5 hanggang 2.8 metro sa silangang baybayin ng bansa. Pinapayuhan ang publiko na iwasan ang paglalayag kapag mapanganib ang kondisyon ng dagat.
“Iwasan ang paglalayag kung mapanganib ang kundisyon ng dagat at lalong-lalo na sundin ang mga abiso at instructions ng ating mga local government units at disaster risk reduction offices,” payo ni Servando.
“Puwedeng magkaroon pa rin ng mga pag-ulan dito sa atin sa Metro Manila, pero ‘yung para mag-raise tayo ng heavy rainfall warning sa ngayon, sir, siguro medyo hindi, pero magkakaroon pa rin ng pag-ulan,” ayon kay Samuel Duran, Assistant Weather Services Chief ng Weather Division ng PAGASA.
Sa kabila ng umiiral na Super El Niño, posibleng magkaroon pa ng hanggang tatlong bagyo sa bansa bago matapos ang 2026.
Ayon kay Assistant Weather Services Chief Ana Liza Solis, ipinakikita ng historical data na mas maraming bagyo ang umaabot sa kategoryang super typhoon tuwing Oktubre sa panahon ng El Niño, mahina man, katamtaman, malakas, o napakalakas ang kondisyon nito.
“Nakikita natin na may mga recurving pa rin na mga bagyo, so ‘yun din po isa sa mga characteristics ng mga bagyo kapag merong El Niño—’yung preferred tracks niya may possibility na nagbabago” ani Solis.—Lyjah Tiffany Bonzo/FRJ GMA News