TURA, Oct 25: Meghalaya a·dokni skanggipa Chief Minister aro Garo Hills Autonomous District Council (GHADC)-ni skanggipa Chief Executive Membor (CEM) Captain Williamson Ampang Sangma-ni chang 36-gipa siani salko Robibar salo, Garo Hills Autonomous District Council (GHADC)-ni gita Tura-ni William Point-o manidilangaha.
Ia salko manianio, a·dokni Cabinet Minister Marcuise N Marak, mongsonggipa sokgipa ong·e, jinmana aganprakangengon, Meghalaya a·dokko man·na gita Capt Sangma-ni krengdilani aro uni janggi tanga gimik Garo Hills-ni manderangna dangdike on·aniko janapangaha.
Capt Sangma-ni janggi tanganio ka·anggipa kamrangko gisik ra·atpilengon, ua saksa a·songko aro jatko dilna changgipa ong·e, Meghalaya a·dokko man·kujaskal, kingkot kamko ka·dilaha ine Marak aganaha.
All Party Hill Leaders Conference (APHLC)-ni president ong·e Capt Sangma, Meghalaya a·dokko man·na krengdilaha ineba Minister aganaha.
Meghalaya a·dokni skanggipa Chief Minister-san ong·aigija Capt Sangma, GHADC-ni skanggipa CEM ong·e, Garo Hills aro Garo Hills-o songdongenggipa manderangni namgnina bang·en on·gilangaha ineba Marak aganaha.
Capt Sangma-ni kamrangko daksningchina, uni mingnamako rakkichina aro Meghalaya a·doko chubata gadangona ra·doangna gita ku·cholsan kamrangko ka·angkuchina gitaba Marak, a·doko songdongenggipa pilak manderangkon didiangaha.
Ia tom·anio, GHADC-ni CEM Dhormonath Ch Sangma-ba dongpae jinmana aganprakengon, Meghalaya a·dokko man·an gita Capt Sangma-ni on·gilanirangko gisik ra·atpilenba, Autonomous District Council (ADC)-ko man·anio uni rike donanggipa kamrangni gimin janapangaha.
Ia tom·bimonganio, Tura Music Academy, knatobegipa sulrangko doke dam·e mesokanichi manderangni gisikrangko nangatbeaha aro ia tom·anio, Hawakhana Baptist Mondolini Dakchakgipa Pamong Raksal D Marak, Isolo bi·anichi pattianiko on·angskaaha.
Program matchotani ja·man jinma, Captain Sangma-ni gopramona re·ange, una pulrangchi aro Isolo bi·chakanichi mande ra·pilskaaniko on·angaha.
The post Capt Williamson A Sangma-ni chang 36-gipa siani salko Tura-o mania appeared first on Hub News.