Sal 10-ni gisepo knachakjaode ari gri NCM-ko ong·atna ka·mikkenata
BAGHMARA: South Garo Hills-ni rama-jal·angko galchipengani bidingo changni chang Non-Corperation Movement (NCM)-ko ong·atgenchimoba a·dok sorkari aro district administration-ni gita mamingkoba aganchakjaengani gimin South Garo Hills-ni nangrimgimin Civil Society Organisation, jekai FKJGP, GSU, ADIL, AHAM, NGCO nangrime Butbal salo dal·begipa tom·bimonganiko ong·ate Government Boys School kal·chakramoni Deputy Commissioner Office-ona re·jomaangaha.
Iani bidingo Federation of Khasi Jaintia Garo Peoples (FKJGP), Southern Zone-ni General Secretary Chunang Marak-ni koborna u·iatani gitade, South Garo Hills a·jani NH-217 ramako ru·uta bilsina tarininggija galchipenganina aro NH-217-ni 24 metre-oniko 18 metre-ona tang·onataniko jegale batanggimin September 2 aro 3 tariko salgnina Non-Cooperation Movement (NCM)-ko ong·ate sal chi·bongana aganchakchina sorkarina somaiko on·genchimoba maming namgipa aro ka·dongani kattarangko aganchaka dongjani gimin chang·satai 24 aro 25 tarikoba apsandake NCM-ko ong·ataiahachim unomangba mamingba namgipa aganchakaniko man·soja, ian South Garo Hills District-o songdonggipa manderangko dal·e ra·gija gita ong·a ine dal·begipa tom·aniko ong·atenba dabianirangko dakangaha ine ua aganaha.
Da·alo dal·begipa tom·bimonge aro re·jome, rama jal·angni bidingo dabianirangko dakgenchimoba mamingba ka·dongani kattarang dongtaijaode mikkangchi maidakgipa ja·kurangko de·gen ine sing·anina aganchakengon, chingni dabianiko salchikkingni gisepo aganchakchina sorkarina somaiko on·na tik ka·angaha, unigisepon chingni dabianiko knachakjaode ba mamingba ka·dongatani kattarangko aganchakjaode South Garo Hills a·jao sima-arigri NCM-ko ong·atangna tik ka·aha aro night blocked-ko dakanggen ineba FKJGP, Southern Zone-ni General Secretary Chunang Marak parakataha.