Madaxweyne Deni oo culimada ka codsaday inay xal u raadiyaan khilaafka Somalia.

Qaar kamid ah culimaa’udiinka reer Puntland ayaa si adag uga hadlay xaaladda Siyaasadeed ee Soomaaliya, khilaafyada ka dhashay arrimaha dastuurka, doorashooyinka iyo is-haysiga siyaasiyiinta ku loolamaya kursiga Madaxtinimada ee ugu sarreeya Soomaaliya.

Sheekh Maxamuud Xaaji Yuusuf oo kamid ah culimaa’udiinka Puntland ee ku sugan Garoowe ayaa sheegay inay la kulmeen Madaxweynaha Puntland Siciid Cabdullaahi Deni, uuna u ogolaaday in talada culimada lagu wareejiyo, isagoo ugu yeeray Madaxda Dowladda federalka ah ee Somalia inay talada dhulka dhigaan.

“Dowladda Puntland waxaan la kulanay Madaxweynaha anagoo dhawr culimo ah wuxuu yiri “culimooy gala arrinta xal keena”, ogolaansho ayaan ka haysanaa waa caddaynayaa maanta xilku wuxuu saaran yahay dowladda Xamar inay talada dhulka dhigaan”, Ayuu yiri Sheekh Maxamuud Xaaji Yuusuf.

Dhanka kalena, Sheekh Maxamuud Xaaji Yuusuf ayaa si adag uga hadlay cawaaqib xumida ka dhalankarta xukunka oo laysku dhejiyo iyo haddii aysan talada dhulka dhigin Madaxda dowladda federalka ah ee Soomaaliya isagoo ka codsaday Madaxweynaha Soomaaliya inuu wadahadalka ogolaado, ayna arrinta shareecada Islaamka u wareejiyaan, isagoo xusay in beesha caalamka iyo danleeyda siyaasadda caalamku aysan dan u hayn dhammaan dhinacyada Soomaalida.

“Warka lalee yahay haddaan dhulka la dhigimaayo, haddii aan dhulka la dhigin talada meel daran ayey ka dhacaysaa waxaan u gudbinaynaa Madaxweynaha iyo dowladdiisa walaalayaalow talada dhulka dhiga, hay’adahaan beesha 6aad iyo waxaad aad daba-joogtaan & dowladaha dhegta wax idinku sheegaya wallaahi ayeysan waxba idin tarayn ee arrinta dhulka hala-dhigo oo haloo ogolaado diinta iyo shareecada Islaamka”, Ayuu yiri Markale Sheekh Maxamuud Xaaji Yuusuf.