Ang lungkot na unang naramdaman sa pag-aakalang hindi na naman niya makikita ang lahat ng kaniyang anak na magkakasama sa kaniyang kaarawan dahil mga nasa ibang bansa, napalitan ng pagkabigla at labis na kasiyahan.
Sa nakaraang episode ng Good News, ipinakilala ang butihing ina na si Martina Jayme Balmaceda, na walang ibang hiling para sa kaniyang ika-64 kaarawan kundi ipagdiwang ito kasama ang mga anak.
Walong taon na ang nakararaan nang huli niyang makasama nang kompleto ang kaniyang mga anak na sina Martin Jay, Justine, Honey, Christine, Veronica at Joseph Benjamin.
Mag-isa noong itinaguyod ng single mom na si Nanay Martina ang kaniyang anim na anak sa Cebu.
“Ang dami kong pinasukan na trabaho. Mostly, secretary. Basta kung anong raket meron, pinapasok ko para lang may maiuwi ako,” sabi ni Nanay Martina.
“She would always put us first before herself. Kahit hindi naman kami mayaman, she always makes sure na okay kami, provided 'yung mga needs namin, and may makakain kami,” sabi ni Veronica Lou Valle, anak ni Nanay Martina na nasa Dubai.
Ikinayod din ni Nanay Martina na makapagtapos ng pag-aaral ang kaniyang mga anak.
“It became their driving force na talagang dapat sila mag-aaral, dapat silang makatapos. Kasi yun 'yung share nila sa responsibility,” sabi ni Nanay Martina.
Hindi naman binigo ng mga anak si Nanay Martina nang maka-graduate na ang lima sa kanila.
Nakahanap ng magandang trabaho ang panganay na anak na si Martin Jay sa Cebu bilang isang customer support sa isang order processing company.
Sinubukan naman ng apat niyang mga kapatid ang kanilang kapalaran sa abroad. Nag-Canada si Justine, habang nagtrabaho bilang customer accounts executive sa Singapore si Honey.
Admin staff sa Belgium si Christine, habang may pinatatakbong negosyo sa Dubai si Veronica.
Sa kasalukuyan, tanging ang bunso na lang ni Nanay Martina na si Joseph Benjamin Jayme Balmaceda ang nag-aaral pa.
Hindi naman maiwasang malungkot ni Nanay Martina dahil minsan niya na lamang makita ang mga anak na nasa abroad.
Para maibsan ang kaniyang pangungulila sa mga anak, tinitiyak niyang gabi-gabi sila nakakapag-chat o video call.
“Ang Facebook namin maingay sa gabi. Doon ako nagiging masaya na nakikita ko sila, nakakausap ko sila at alam ko kung ano nangyayari sa kanila,” ani Nanay Martina.
Lingid sa kaalaman ni Nanay Martina, noong nakaraang taon pa pinaghahandaan ng magkakapatid ang kanilang pag-uwi sa Cebu nang sabay-sabay para ipagdiwang ang kaniyang birthday.
“Eight years po kami hindi nagkita. Siguro one of the best gifts we can give her is to be there personally,” ani Veronica.
“The process was really difficult kasi hindi talaga kami magkakasabay,” sabi ni Christine Marilou Jayme Bordas.
Sa gabi ng salubong para sa kaniyang ika-64 kaarawan nitong Agosto 8, isinagawa na ng magkakapatid ang sorpresa.
Walang ideya si Nanay Martina na nakaabang na pala sa restaurant ang kaniyang mga anak at mahal sa buhay para sorpresahin siya.
Pagpasok niya ng pinto, may halong gulat at pagkatuwa si Nanay Martina nang makita ang mga anak at apo na sumalubong sa kaniya.
“Masaya talaga. Hindi ko siya ma-express. I felt so special,” sabi ni Nanay Martina.
Tunghayan sa Good News ang madamdaming mensahe ng magkakapatid para sa kanilang ina. Panoorin. – FRJ GMA News