Omufita wongeleka yoshiveva i li momukunda Enyana, Lazarus Shafashike ota nyenyeta eshi ongeleka yaye ya hanaunwa po kumwene womukunda wavo molwaashi vati tai dopeke ovanafikola.
Omukunda Enyana ou li moshikandjohoololo shaKongo moshitukulwa shaHangwena.
Ovatifita voiveva ova holola kutya ova didilika eengeleka doiveva monooli da ninga oihakanwa yokutewa po komalelo omapamifyuululwakalo.
Tava ti efimbo keshe otava nyenyeta tava ti ka shi li pauyuuki eshi eengeleka davo hadi hanaunwa po.
Meenghundafana naKundana onghela, Shafashike okwa hokolola ta ti ponhele opo va tunga ongeleka ova pewa po kumwene womukunda wavo.
“Paife ota lundile ongeleka yange kutya otai pukifa oshiwana momukunda. Okwa tameka okutotela ongeleka yange omahokololo oipupulu kutya oha mu kala ovanafikola fiyo oufiku,” ta ti.
Okwa ti ongeleka yaye oya ninga mo odula imwe momukunda omo.
“Ame ongeleka yange itai pukifa oshiwana. Ota popi oipupulu,” ta ti.
Okwa ti elalakano longeleka yaye okuudifila oshiwana ondjovo yomwene osho yo okuyandja ehongo lombiibeli nokuxwaxwameka oshiwana shi fike poteembeli yomwene.
Shafashike pamwe noilyo yongeleka yaye ova hokolola tava ti ka shi li pauyuuki eshi va pewa epitikilo kumwene womukunda wavo va ninge ongeleka ashike paife oya tewa po.
“Elelo laUkwanyama ka li na oufemba wokuteya po ongeleka yetu. Omolwaashi eengeleka dihapu doiveva da ninga oihakanwa yokutewa po ashike eengeleka dimwepo iha di tewa po,”a nyenyeta.
Mwene womukunda Enyana, Immanuel Kalwenya okwa hokolola ta ti ongeleka e i oya hanaunwa po shaashi ota tungwa momukukunda ihe na epitikila okudja mombelewa yaye.
Okwa ti osho shi li ongeleka e i otai pukifa ovanafikola molwaashi paife ohava dopa eshi hava kala ashike ve li kongeleka oko fiyo oufiku.
“Ovadali vovanafikola hava i kongeleka e i ove ya kombelewa yange tava nyenyeta kombinga younona vavo tava dopa shaashi ve li ashike kongeleka e i,” ta ti.
Kalwenya okwa ti ovadali ovo vene va popya kutya ongeleke nai dje mo momukunda wavo.
“Tete onda popya namwene wongeleka kutya na kufe po ongeleka yaye shaashi ina pewa epitikilo. Okudja opo onda shiivila ombelewa yoshikandjo shetu kombinga yoshikumhungu eshi,” ta ti.
Okwa ti okwa fatululila mwene wongeleka kombinga yokatendo ha ka longifwa kelelo laUkwanyama ngeenge omunhu e li kufila edu ehe na epitikilo.
“Onda landula kokatendo ka tulwa po kelelo letu ndele hatu dengulula po ongeleka ei,” ta ti.
Mwene womukunda okwa hokolola ta ti nopolifi okwa li ya fika pongeleka opo ndele tai pula omikanda dongeleka ashike ka pe na omikanda.
“Omufita wongeleka e i ha mo adi momukunda wange, okwa dja ashike komakule e u ya okuninga ongeleka mekove lonhumba melongelokumwe nomunhu umwe po e li oshilyo shongeleka yaye,” ta ti.
The post Ongeleka yoshiveva ya hanaunwa po…shaashi vati tai dopeke ovanafikola appeared first on New Era.