Oikundaneki oya indilwa i nghonopeke okuhada omauyelele nokulongela kumwe nOkomisi yOkulwifa Oulingilingi mokweeta oulingilingi kombada, okuxwaxwameka ekalelepo loinima nokukwashilipaleka kutya omaliko oshiwana otaa tyapulwa kOvanamibia aveshe.
Omukulunhuwiliki wOkomisi yOkulwifa Oulingilingi Bryan Eiseb pefimbo lomutumba wokomudo wokomisi noikundaneki moSwakopmund Etivali, okwa ti ovatoolinghundana ovakufimbinga va fimana mokulwifa oulingilingi, ndele ta denge omufindo komumbwe yomulandu wa nuka po wa kwatela mo omahangano oshiwana, oshikondo shopaumwene noshiwana ashishe.
“Oilonga yoikundaneki itai dulu okudiniwa, ohai dulu okweeta koluheela elongifo loimaliwa papuko ile oinima yopapolitika ihe li mondjila, okunyana oumbudi woimaliwa nokweeta oinima aishe inai yela nawa koshiwana,” osho a ti ngaho.
Eiseb okwa ti oulingilingi ohau i eyambukepo lopashiwana moshipala okupitila melongifo lomaliko moinima ya puka, ponhele yoku a longifa moinima ngaashi ehongo nomayakulo akwao a fimana, omanga tau nghundipaleke omahangano, tau teya oveta nokuteya po elineekelo loshiwana mepangelo.
Okwa ti oikundaneki oi na oshinakuwanifa sha kula shokupula kombinga yelongifo lomaliko oshiwana, okukonakona omaliumbato a puka nokukwashilipaleka kutya oikumungu ya pamba oshiwana oya talwa nawa.
Omukulunhuwiliki okwa ti oilonga yoikundaneki i shii okulineekelwa otai dulu yo okuvatela kuningwe omakonakono opambelewa, omavalulo nomatamaneko komalutu oveta omondjila, unene ngaa ngee ouyelele ou wa nyanyangidwa wa eta oshiwana shi pule ekalelepo loinima.
Okwa indila ovatoolinghundana va longife nawa ouyelele woshiwana, ouyelele wa manguluka nosho yo oinima aishe tai dulu okulongifwa momakonakono kumonike opo pa ya oimaliwa yoshiwana nokunyana keshe ou a kwatelwa moulingilingi.
-Nampa
The post Oikundaneki ya pulwa i kufe ombinga mokulwifa oulingilingi appeared first on The Namibian.