Elelo loshitukukwa shaMusati ola tula poshitaafula oshimaliwa sheemiliona N$4, sha nhuninwa okutungila omaumbo 542 oundjuwo, e li komikunda moikandjohoololo ya yooloka. Edi oda kolekwa oshivike dja ka ko komunashipundi welelo loshitukukwa shaMusati Daniel Ilende.
Iilende ou natango e li Kansela woshikandjohololo shaGongo.
Okwa yelifa ta ti oundjuwo ova nhuninwa unene ovakulupe osho yo ovanhu ve na oulema mwa kwatelwa ounona.
Okwa ti okwa didilikwa ovanhu ve na oulema novakulupe va taalela omashongo oundjuwo eshi have ve li kwafele ashike moixwa ile meenduda.
Okwa weda po ta ti ovanhu ve na oulema vamwe ove li koutemba, hano ngeenge oushitwe tau ifana, ohava li kwafele ashike momaumbo shaashi pehe na oundjuwo.
“Omunhu e na oulema okwa pumbwa okuyambididwa pamikalo da yololoka,” a weda po.
Iilende okwa hokolola ta ti oundjuwo 136 ova pwa nale okutunga.
“Ova tungwa koikandjohoololo ya yooloka ngaashi Etayi, Elim, Ogongo, Okalongo osho yo Ruacana. Kansela okwa ti ovanhu 50 ova kutwa pefimbo oundjuwo ava tava tungwa.
“Oha tu lalakanene okueta po eemhito doilonga kovanyasha.
Naashi, otashi kwafele okulwifa ondjala noluhepo,” ta ti.
Iilende okwa yelifa ta ti paife okwa fyaala oundjuwo 140 tava va teelika okukala va tungwa.
“Otava ka tungwa koikandjohoololo natango ya yooloka ngaashi Onesi, Tsandi, Oshikuku, Otamanzi, Okahao, Outapi osho yo Anamulenge,” ta ti.
Okwa yelifa ta ti oundjuwo ava otava ka tungwa kovanyasha tava di koshiputudilo shopaungoba sha Nakayale.
“ Elalakano okuxwaxwameka ovanyasha vetu ve li koiputudilo yopoungoba opo va longife ounongo wavo,” ta ti
Okwa weda po ta ti otava yandje omhito kovanyasha opo va mone owino yokutunga.
Kansela okwa ti ombelewa yelelo loshitukukwa shaMusati otai lalakanene okukwashipaleka kutya eumbo keshe li na omukulupe novanhu ve na oulema oli na oundjuwo.
Okwa kumaida oshiwana opo shi longele kumwe novanhu tava tungu oundjuwo molwaashi eshi otashi kwafele oilonga i kale ya pwa diva.
Ovanhu ovo va tungilwa nale oundjuwo ova hokolola tava ti ova pandula epangelo eshi le va tungilwa oundjuwo molwaashi eshi tashi ulike olukeno nefiloshisho lovakulupe.
-fhamalwa@nepc.com.na
The post Ovakulupe tava tungilwa oundjuwo kOmusati appeared first on New Era.