TURA: South West Garo Hills a·jani Garobadha jolrango bijoli sisimengani a·sel, jolo songdongenggipa manderang, mongsongbate poraienggipa chatro chatrirang aro dingtang dingtang kamrangko ka·enggipa manderang, neng·nikanirangko chagrongna nangtokenga ine A·chik Conscious Holistically Integrated Krima (ACHIK) parakatenba, ia jolrango bijoliko nambate on·china MeECL Garobadha Sub-Division-ni official-rangko didiataha.
Iani bidingo, MeECL Garobadha Sub-Division (Power Distribution)-ni Assistant Executive Engineer-na sedoatengon, Garobadha jolrango maming u·iatsamsoani gri, bijoliko kimitrongengani a·sel jolo songdongenggipa manderang, mongsongbate chatro chatrirangni poraianio, bading chiwalanio, office-ni kamrangko ka·anio, sanna bananirangko on·anio aro dingtang dingtang kamrango neng·nikanirangko chagrongna nangenga ine ACHIK dolni dilgiparang parakataha.
“Una agreba, voltage tik ong·jani a·sel aro ru·uta somoirangna bijoli sirongani a·sel, bijoli jakkalenggipa manderang neng·nikanirangko man·na nangenga aro manderangni ma·manti bosturang nosto ong·atako man·enga,” ineba ACHIK dolni dilgiparang parakataha.
Chatro chatrirangni poraianirango, bading chiwalani kamrango aro dingtang dingtang kamrango, bijolio ka·dongna man·na nanga ine janapatengon, Garobadha jolrango bijoliko nambate on·na gita ta·raken ja·kurangko de·china ACHIK dolni dilgiparang, MeECL Garobadha Sub-Division (Power Distribution)-ni Assistant Executive Engineer-ko didiataha.
Ia jolrango bijoli sisimaniko namatna gita nosto ong·gipa line-rangko tarichina aro transformer-rangko nambate nirokchina gitaba ACHIK dabiangaha.