© APA | Türkiyənin Milliyyətçi Hərəkat Partiyasının (MHP) sədri Dövlət Bağçalı
23 oktyabr 2026 21:50 (UTC +04:00)
Azərbaycan-Türkiyə qardaşlığının qorunması və iki ölkə arasında həmrəyliyin gücləndirilməsi bütün Türk dünyasının ortaq gələcəyi baxımından strateji əhəmiyyət daşıyır.
APA-nın türkiyə bürosu xəbər verir ki, bunu Türkiyənin Milliyyətçi Hərəkat Partiyasının (MHP) sədri Dövlət Bağçalı Azərbaycanın bu ölkədəki səfiri Rəşad Aslanovla görüşündə bildirib.
Görüşün təfərrüatları barədə səfir Rəşad Aslanov sosial şəbəkə hesabında məlumat paylaşıb.
Diplomat Prezident İlham Əliyevin salamlarını Dövlət Bağçalıya çatdırıb, həmçinin Azərbaycan-Türkiyə qardaşlığının müdafiəsinə verdiyi dəstəyə görə ona dövlət başçısının təşəkkürünü ifadə edib.
Dövlət Bağçalı da öz növbəsində Prezident İlham Əliyevə salamlarını çatdırmağı xahiş edib və hər zaman Azərbaycanın yanında olduğunu vurğulayıb.
MHP sədri Azərbaycanla Türkiyə arasında həmrəyliyin daha da möhkəmləndirilməsinin vacibliyini qeyd edib.
O, iki ölkə arasındakı münasibətlərin bundan sonra da qarşılıqlı hörmət, bərabərhüquqlu tərəfdaşlıq, etimad və qardaşlıq prinsipləri əsasında inkişaf edəcəyinə əminliyini ifadə edib.
