TURA: A·chik Literature Society (ALS), Durama College-ni Garo Department aro Internal Quality Assurance Cell (IQAC) baksa bakrime Sukrobar salo Durama College-o Regional Writer’s Workshop-ko ong·atanga.
A·chikkuko skie ra·enggiparangna ku·tangchi sea-jotaniko nambatatna cholko on·enba, mikkangchi A·chikkuo sea-jotani bidingo ripingangna mangsonge ia Writer’s workshop-ko ong·atangaha.
Ia tom·bimonganio mongsonggipa ong·e bakko ra·giparangoni A·chik Literature Society (ALS) ni President, Prof. Caroline R. Marak, jinmana aganengon, A·chikkuko a·doko aro a·songo tang·doatna re·mikkangengon A·chik Literature Society (ALS) bang·bata changon skie ra·chakram skul college-rango skie ra·enggiparangna Workshop-ko ong·atjringe, ku·tangko sena changgipa manderangna dakchakaniko on·rongenba ku·tangko tang·doatanio on·gilgipa ong·china sakanti dal·drobaenggipa A·chik chadamberangko didienga ine aganaha.
Tom·anio sakgipin mongsonggipa ong·e bakko ra·gipa Durama College-ni Principal, Krittarson N. Sangma, jinmana aganengon, sakanti sninggiparang an·tangtangni skie ra·gimin ku·tangko jakkalpil·taie ku·tangchi sea-jotani bidingo tang·doatna rake ja·ku de·gipa ong·na nanganiko janapaha.
Una agre programni bako NEHU, Turani Dr. Jacqueline R. Marak, sakanti sninggiparangan, a·gipi ku·tangchi ki·tap segiparangoniko skie ra·e sea-jotaniko nambatatna gisiko nanggiparang ong·na nanga ine aganan baksana, ku·tangchi segimin adita ki·taprangko nipiltaie seani bidingo nambatatna dakchakaniko man·gen ine taldapatangaha.
Prof. Fameline K. Marak, gitcham Pro. Vice-Chancellor NEHU Tura; Dr. Colnat B. Marak, Vice President ALS; Dr. Rhinkle M. Marak, Asst. Professor Tura Government College; Basan R. Marak, Asst. Professor Tura Christian College; Dr. Bilnang K. Sangma, Asst. Professor Williamnagar Government College; Dr. Amanda Aski M. Momin, Asst. Professor Captain Williamson Sangma State University, Linguistics-ni bidingo dingtang dingtang bewalo skie ra·na nanganiko talatangskaaha. Programni bon·kamgipa bako A·chikkuko ripingna mangsonge sea-jotanio ra·giparangna certificate-korangko on·angskaa.