Aron Mushaukwa
KATIMA MULILO – Muuna walilimo zemashumi amane kazelobapeli yasimuluha mwanaha Zimbabwe, ni musizana walilimo zemashumi amabeli yasimuluha mwanaha Namibia, nebatimezi Lasabata kakusanana kanako ya07h00, mwamukwakwa ozwa Katima Mulilo kuliba Ngoma, kasamulaho motikala mone bakwezi yene longile batu balishumi nepindumukile kulatelela kupanca kwaliwili.
Mwapiho yasipokola yene filwe kwababihi bamakande, muzamaisi wasipokola mwasikiliti saZambezi Julia Sakuwa-Neo naize mukwaezi neili muuna walilimo zemashumi amane akazeketalizoho yasimuluha mwanaha Zimbabwe, ili mubeleki kwasikolo saUnam.
“Motikala yamufuta waToyota Landcruiser ili yasikolo salituto zepahami saUnam nelongile babeleki balishumi bane balibile mwanaha Botswana, liwili halipunyeha mi mukwaezi alatehelwa ki kamaiso yamotikala,” nekubulezi Sakuwa-
Neo.
Sakuwa-Neo nazwezi pili kutalusa kuli babamwi bane bakwezi mwamotikala yeo nebafumani likolofalo zeinyani kuisa kuzetuna. Mwahalaa bona baketalizoho ki bayahi banaha Zimbabwe mi bababeli ki bayahi banaha Namibia. Lilimo zabona limwahalaa 23 ni 61.
Nabulezi hape kuli babañwi bane bakwezi mwamotikala nebakutela habobona kasamulaho amukopano waKAZA one ubileteñi kwamutayi wasikolo saUnam mwaKatima Mulilo. Kanako yakufa piho bahabo bane batimezi nebasikalemusiwa kale kacwalo mabizo abona nasika patalazwa.
The post Bababeli batimela mwakozi yafamukwakwa mwaZambezi appeared first on New Era.