TURA: Indiani Chief Election Commissioner (CEC), Gynesh Kumar aro Bharatiya Janata Party (BJP) dolni kosako jegale West Garo Hills, Tura District Congress Committee (TDCC)-ni gita Bristibal salo Tura-o re·jomaaniko dakangaha.
Chief Election Commissioner, Gynesh Kumar aro Bharatiya Janata Party (BJP) dolni kosako jegale rejomaanio a·dokni gitcham Sports Minister Jenith M Sangma jinmana aganangengon, da·alo ma·mong sorkariko chalaienggipa Bharatiya Janata Party (BJP), A·songko chel·chakna gita dingtang dingtang dongimin niam retirangko rim·kepe pangna jolna sasonni bilko jakkepe dongna ine miksongenba democracy-ni niamrangko dakbadee kamrangko ka·enga ine aganaha.
Jensalo BJP bilona re·baaha unon uamang party-na chakgipa mandeko Indiani Chief Election Commissioner-na seoke, election ong·na skangskang Special Intensive Revision (SIR)-ko ong·atrongenba chong·motgipa manderangni voter list-ko den·gale galrongenba Democracy-ni bilko rim·kepe A·songni manderangna bang·a sinjetanirangko on·enga. SIR-ko dakani gimin jegalengade ong·ja iakode dakna nanga indiba 2005 bilsio SIR-ko dakanio A·songni manderangna maming neng·nikani dongjachim indiba da·alo BJP-ni bilona re·baani somoio SIR-ko dakaniko A·songni manderangna bang·a neng·nikaniko on·enga ineba Sangma aganaha.
Indake BJP dolni ong·gija dakdraani kamrangko nie dongangkuode chasong gimik uamangan bilo donge A·songni manderangna bang·en sinjetaniko on·angkugen ine aganengon, India-o sakgittam Election Commissioner donga unoni saksade Chief Election Commissioner ong·a. Uandake Three Member Committee-o je chanchianirangko dakengon, uamangoni sakgni member-rangde iako dakode bang·a manderangan voter list-oni changalako man·gen aro iako dakode namjawa ine chang 14-na kingking uamang jegalahachim, indiba CEC, Gynesh Kumar uamangko knachakgija dakdraenga ine ua aganaha.
Unigimin, darangnaba chakani gri kam ka·na nangnagipa institutional office-oni Gynesh Kumar an·tangan kamtangko watna nanga ong·jaode biko ra·gale galna nanga ian an·chingni dabiani ong·a aro da·aloba iani gimin an·ching re·jomenga ine aganenba ua an·tangan kamtangko watjaode aro uko ra·gale galjaode dontonggija mikkangchiba dingtang dingtang Congress-ni gita ja·ku de·anggen ine gitcham Sports Minister, Jenith M Sangma jinmao aganangaha.
TDCC, uamangni re·jomaaniko Congress Bhavan-oni a·bachenge Babupara, DC, SP Office, Tura Bajar-ko wilwile apsandake Babupara gita re·bapile Congress Bhavan-ona ong·atangaha.