© APA | İqtisadiyyat nazirinin müavini Anar Axundov
14 oktyabr 2026 10:39 (UTC +04:00)
Azərbaycan iqtisadiyyatın müxtəlif sahələrində beynəlxalq tərəfdaşlarla birlikdə genişmiqyaslı investisiya layihələrini uğurla həyata keçirib.
“APA-Economics” xəbər verir ki, bu barədə iqtisadiyyat nazirinin müavini Anar Axundov Bakıda keçirilən Azərbaycan-Laos İnvestisiya və biznes forumunda çıxışı zamanı bildirib.
“Bu layihələrin uğuru yeni layihələrin reallaşdırılmasını sürətləndirir. Laos şirkətləri də bu imkanlardan yararlanmağa dəvət olunur.
Şirkətlər iş yerləri yaradır, yeni texnologiyalar tətbiq edir və gəlir formalaşdırırlar. Güclü özəl sektor sabit məşğulluq, orta təbəqənin genişlənməsi və bütün regionların inkişafı deməkdir. Əminik ki, biznes icmalarımız arasında tərəfdaşlıq hər iki tərəf üçün faydalı olacaq,”- deyə o qeyd edib.
Onun sözlərinə görə, Azərbaycanın qeyri-neft iqtisadiyyatı artmaqda davam edir: “Hazırda qeyri-neft sektoruna yatırılan investisiyaların yarıdan çoxu özəl şirkətlərin payına düşür. Azərbaycan sahibkarlara güzəştli maliyyələşdirmə, kredit zəmanətləri, vergi və gömrük güzəştləri, eləcə də müntəzəm dialoq vasitəsilə dəstək göstərir. Dövlət, həmçinin ixracatçıların nəqliyyat və logistika xərclərinin 70%-dək hissəsini, eləcə də gömrük rəsmiləşdirilməsi xərclərinin bir hissəsini kompensasiya edir.
Ələt Azad İqtisadi Zonasında xarici investorlar tam xarici mülkiyyət hüququndan, mənfəətin sərbəst şəkildə ölkə xaricinə köçürülməsi imkanından yararlanırlar və yerli tərəfdaşın cəlb edilməsi tələb olunmur.
Konkret investisiya imkanlarının müəyyənləşdirilməsi üçün özəl sektorlarımız arasında birbaşa əlaqələrin qurulması vacibdir. Ticarət palatalarımız arasında müntəzəm əlaqələr isə şirkətlərə layihələrinin icrasını davam etdirməkdə kömək edəcək”.
