Shillong, Risaw 19: Ka Hynniewtrep National Youth Front (HNYF), East Khasi Hills, ka la pyrshah ïa ka jingthmu ban pynlong ïa ka Shillong Literary Festival ha Nan Polok (Ward’s Lake) bad dawa na ka Sorkar Jylla ban pynkynriah noh ïa kane ka tamasa sha kawei pat ka jaka kaba biang.
Ha ka shithi ba la aiti sha u Myntri Rangbah ka Jylla Conrad K. Sangma, ha ka sngi Nyngkong, u President ka HNYF Stevenson Raymond Khyriem, u la ong ba ka Wards Lake, kaba iatip kum ka Nan Polok, ka dang don hapoh ka projek ban shna pynbha bad pynitynnad biang ia ka kaba kot T. 25 klur. Namarkata, kam dei ban shah pynkhia da ki prokram kiba heh kiba lah ban ktah ïa ka jinglong jingman jong ka.
Ka seng ka la pynshai ba kam pyrshah ïa ka Literature lane ïa ka Literary Festival, hynrei ka pyrshah ïa ka jingjied ïa ka Nan Polok kum ka jaka ban pynlong ïa kane ka tamasa.
Haba pynpaw ia ka jingpyrshah, ka HNYF ka ong ba ka Nan Polok ka long kawei na ki jaka ba donkam ha ka liang ka jingitynnad ka mariang, kaba don ia ki khana pateng, bad kaba ai ia ka jaka ban pynjah thait bad iaid kai pynngad ki paidbah bad ym dei ban shu pyndonkam beit ia ka na ka bynta ki prokram ba kynthup ia ka jingshna pandal, jingpynmadan ba shipor, wanrah ia ka jingtuid paidbah kaba bun bad pynmih ia ka jaboh.
Ka HNYF ka la kdew ruh ba ka jingpynlut ïa ka pisa paidbah ban pynbha bad pynutynnad ïa ka pung, hynrei ha kajuh ka por la shah pat ïa ki kam kiba lah ban pynthut ïa ka jingkoit biang jong ka mariang ha sawdong jong ka, ka long kaei kaei kaba long mar khongpong.
Napdeng ki san tylli ki mat jingdawa, ka HNYF kala dawa ban pynkynriah noh ia ka tamasa, pyni paidbah ia ka environmental clearance, ka stafety bad waste-management plan, ka jingleit khmih ia kiwei pat ki jaka ban pynlong ia ka tamasa kum ka State Central Library, State Convention Centre bad Garison Ground, ban thaw ia ka policy kaba shai ban pyndonkam ia ki jaka paidbah kiba lah ban shah ktah ka mariang bad ka jinglong shai ha ka rukom jied ia ka Nan Polok.
“Ka jingroi ha ka liang ka kolshor kam dei ban wanrah ïa ka jingduh noh ïa ka jingkitkhlieh ïa ka mariang bad ka jingïada ïa ki jingdon jingem paidbah,” la ong ka HNYF, da kaba bynrap ba ka jingpynlut pisa paidbah ban pynbha ïa ka jaka ka dei ban ïahap bad ka rukom pyndonkam kaba don jingkitkhlieh.
Ka seng ka la kyntu ïa ka Sorkar Jylla bad ki nongpynïaid ïa ka tamasa ba kin shim ïa ka rai kaba pynïahap ïa ka jingkyntiew ïa ka kolshor, ka jingïada ïa ka mariang bad ka jingmyntoi jong ki paidbah.
Pule ruh : Kyrpad ka Central Puja Committee ia ka Durga Puja kaba suk ba kmen hadien ka jingjia Mawbah
Peit ruh
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
The post Dawa ka HNYF ban pynkynriah ia ka Literary Festival na Nan Polok sha kiwei pat ki jaka appeared first on Hub News.