Golden Jubilee-ko manina sorkari gong kror 25-na baten koros ka·enga
TURA: 100 Drums Wangalani bilsi 50 gapaniko maniani bak gita ia chang 1000 Drums Wangala Festival ba dama bol 1000-ko doke Wangala manianiko ong·atna siengani gimin Budbar salo, a·dokni Chief Minister Conrad K Sangma, Wangala A·dam Chibragre-ona re·ange, ia manianiko ong·atna tarisamsoanirangko niangaha.
Ia Wangala manianiko ong·atna tarisamsoaniko niangani ja·man kobor ra·timgipa manderangna agan-talate on·angengon, ia Wangala maniani Golden Jubilee ba bilsi 50 gapaniko manina gita a·dok sorkari, 100 Drums Wangala Festival Committee baksa nangrime kamrangko ka·enga aro ia manianiko sokachakna gita sorkari, gong kror 5.50-ko on·na committee-na ku·rachakaha ine Chief Minister parakataha.
Unbaksana, Public Works Department (PWD)-ni ning·o ramarangko tarina aro dingtang dingtang kamrangna gong kror 20 tangkarangkoba chamdapahani gimin sorkari, gimik gong kror 25.50 tangkarangko ia Wangala manianina koros ka·enga ineba Chief Minister parakataha.
100 Drums Wangalani bilsi 50 gapaniko maniani bak gita ia chang 1000 Drums Wangalako ong·atengani gimin ua an·tangan kamrangko nina re·baaha ine janapatengon, kamrangko ka·samsoanio maiba neng·nikanirang dongama dongja, uarangko ma·sie ra·na gita ua nangnikaha ine Sangma aganaha.
Wangalani bilsi 50 gapaniko name manina man·na gita kamrangko ka·samsoani namen matchotangengaha ine janapatengon, ia manianiko name chu·sokgipa ong·atna dingtang dingtang department-rang aro organizing committee-ni gisepo nangrime kamrangko ka·na nangani gimin Chief Minister aganangaha.
Bilsianti manirongbaenggipa 100 Drums Wangala maniani, ia bilsio bilsi 50-ko ga·tapengahani gimin ia changode 1000 Drums ba dama bol 1000-ko doke Wangala manianiko ong·atskana tik ka·ahachim ine nikna man·a.
Ia chang 100 Drums-ni pal 1000 Drums Wangalako ong·atna miksongengani gimin gipin biaprangoni manderang bang·en sokbana ka·dongenga aro iana Wangala A·damko dal·batate tarisamsoengaha.
Kam ka·samsoanirangko nipilanganio a·dokni Chief Minister baksana MLA-rang, District Administration-ni official-rang, dingtang dingtang department-ni official-rang aro Wangala Festival Organising Committee-ni membor-rangba dongpaaha.