Tura, Oct 23: Sukrobar salo, Meghalaya sorkarini Education Department, SPARK Meghalaya – School Programmes in Articulation, Resilience & Kindness – State Summit 2026-ko Tura-ni District Auditorium-o ong•atangaha aro ia program-o Meghalaya a•dokni Chief Minister Conrad K Sangma, mongsonggipa sokgipa ong•e bak ra•angaha.
Ia program-ko ong•atanio, District Administration aro Education department-ni official-rang, jury membor-rang, dingtang dingtang skulni principal-rang, skigiparang, chatro chatrirang aro dingtang dingtang a•jani chadamberangba bak ra•angtokaha.
Ia program-ko ong•atanio a•dokni Chief Minister, jinmana aganprakangengon, chadamberang baksa ia program-o bak ra•pana man•ahani gimin an•tangni kusi ong•aniko parakangenba, ia apsan SPARK State Summit-ko re•anggipa bilsio Shillong-o ong•ataha aro ia bilsiode chadamberang, a•doko donggipa dingtang dingtang jatrangni daka rikani, nitoani, cha•ani ringani aro doka dam•anirangko ma•sie ra•na man•na gita Tura-o ong•atskachina ua SPARK dolko aganaha ine parakataha.
Bang•a chatro chatrirangan skanggipa changna Tura-ona re•baaha ine an•tangni kusi ong•aniko parakatengon, a•dokni chadamberang, dingtang dingtang biaprango donggipa jatrangni gimin ma•sie ra•china miksonganion ia State Summit-ko Tura-o ong•ataha ine Sangma aganaha.
Ia SPARK Summit-ara chadamberangna, an•tangtangni changa sapanirangko mesokna namgipa chol ong•a ine janapatengon, chadamberango ka•donganiko aro namgipa mande ong•na skaniko ong•atanian ia program-ni mongsonggipa miksonganiba ong•a ine Chief Minister aganaha.
Chadamberangan a•dokni dal•batsranggipa bil ong•a aro ia cholko ra•e a•dok sorkari, namgipa bewalo cholrangko bikotna nangchongmota ineba ua aganaha.
Sorkarini chadamberangna ra•gate on•gipa program-rangni gimin janapangengon, MGMP-ni ning•o sak 8000 chadamberang, an•tangtangni dakna namnikgipa kamrangchi, tangka paisarangko kamaina aro dingtang dingtang biaprango an•tangtangni changa sapanirangko mesokna cholko man•enga ine Chief Minister aganaha.
Ia SPARK State Summit-ko ong•atahani gimin Education Department-ko mittelpilangengon, Meghalaya a•dokni bang•a program-rangkon da•alo a•songni gadango daksningengaha aro iandakgipa program-rango tangka paisarangko koros ka•aniara indin koros ka•mangmangaiasan ong•jaenga indiba mikkangchi re•banagipa chasongrangna koros ka•samsoanisa ong•enga ine Chief Minister aganaha.
Ia program-ko ong•atanio, SPARK Outcomes Report 2026-koba oprake on•angjolaha aro District SPARK Star-rangnaba mande ra•pilskaaniko dakangaha.
The post Tura-o SPARK State Summit-ko ong•atanio CM bak ra•a appeared first on Hub News.