OHANGWENA- Omukulunhu wopolifi moshitukulwa shaHangwena Commissioner Ottilie Kashuupulwa okwa kumaida oshiwana opo shi ha lye oikombo oyo ya dipawa keima lihe shiviike molwaashi osha nyika oshiponga.
Okwa lopotwa oikombo 42 ya fya ndele tai fipwa ohonde keima lihe shiviike komikunda ngaashi Etope osho yo Outwilo moshitukulwa shaHangwena.
Oshiningwanima osha ningwa oshivike sha dja ko omanga oikombo 18 oya dipawa mexuliloshivike kOutwilo.
Ovakalimo paife ova lulilwa keima lihe shivike eshi la dipaa oikombo yavo.
Ova hokolola tava ti eima e li oha li fipi ashike oikombo ohonde ndele ta li faduka po.
Commissioner okwa kumaida oshiwana opo shi kale shi li oupafi ngeenge sha kofa.
“Kale ni mwa kotoka ngeenge ta mu ende oufiku molwaashi pamwe eima e li ota li dulu okuponokela ovanhu,” ta ti.
Victoria Nghiidipaa okwa hokolola ta ti okwa kanifa oikombo ihetatu okupendukila Omaandaxa.
Okwa ti kashipu okukanifa oikombo molwaashi oimuna yavo oya fimana.
Ova lombwela Kundana tava ti paife ohava nangala ve kwete omipini, ve li oupafi va ningila kutya ngeenge eima ola nhukile koshiunda otave li denge nomipini.
Otaku hokololwa kutya oikombo ya dipawa oya dja momaumbo a yooloka, sha ningwa omafiku a yooloka efimbo loufiku.
Ovanhu ova hokolola tava ti ti ohava mono ashike omakodolo eshi eima la enda.
“Ngeenge owa hange la enda pedu oto hange po omakodolo a kula, osho tashi ulike kutya eima ola pama shaashi ta li fipi oikombo ohonde,” umwe ta hokolola.
Fredinard Vatileni oye umwe naye e na oikombo yaye ya dipawa keima eli, nokwa hokolola ta ti ngeenge va nangala ohava udu ashike eshi oikombo tai kwena.
Kansela woshikandjohoololo shaMulonga, omo muna omikunda da lopotwa eima ta li dipaa oikombo, Erickson Ndawanifa okwa kumaida oshiwana opo shi xulife po okulundila vakwao kutya omaima okwa dja momaumbo amwe po.
“Ka shiwa okukakeka edina lamukweni uhe na ouyelele womondjila,” ta ti.
Omudo wa dja ko, Kundana okwa li natango a pitifa onghundana kombinga yeima lihe shivike la dipaa ndele ta li fipi eembwa heyali ohonde kEndola moshitukulwa tuu shaHangwena.
The post Ina mu lya oikombo ya dipawa keima lihe shiivike – Opolifi…oikombo 42 ya dipawa appeared first on New Era.